ԵՐԵՎԱՆ, 3 հոկտեմբերի – Sputnik․ Երևանի «Նոան» կոնֆերենցիաների լիգայի հիմնական փուլի առաջին խաղում, սեփական հարկի տակ 2։0 հաշվով պարտության մատնեց չեխական «Մլադա Բոլեսլավ» թիմին։
«Նոան» շատ ակտիվ սկսեց խաղը, ու արդեն 24-րդ վայրկյանին հետևեց հարված մրցակցի դարպասին։ Բայց հյուրերը կարծես թե պատրաստ էին խաղի նման զարգացմանը, ու որոշ ժամանակ կարողացան հավասարեցնելն խաղն ու ինչ-որ դրվագներում էլ սպառնացին Չանչարևիչի դարպասին։ Իսկ ահա առաջին խաղակեսի միջնամասից սկսած «Նոայի» առավելությունը զգացվեց, ու շատ արագ մերոնք կարողացան ստանալ խաղային ու տարածքային առավելությունը։ Չեխերի դարպասին վտանգավոր պահերը հաճախակի էին, բայց մեր թիմի ֆուտբոլիստների մոտ չէր ստացվում վերջին ու արդյունավետ հարվածը։ Գոլը հասունանում էր, բայց չկար։ Կողմերը ընդմիջման գնացին՝ անառիկ պահելով սեփական դարպասը։
Երկրորդ խաղակեսում վերջապես հաջողությունը ժպտաց մեր թիմին։ Հանդիպման 57-րդ րոպեին Մաթեուս Այասը եզրափակեց Վիրջիլ Պինսոնի փոխանցումն ու առաջ մղեց «Նոային»։ Մեր թիմը սկսեց գործել ավելի ոգևորված, բայց մրցակիցն էլ վտանգավոր էր, ու դրվագներից մեկում միայն Օգնեն Չանչարևիչի վստահ խաղը փրկեց մերոնց անախորժությունից։ Իսկ 76-րդ րոպեին մերոնք կրկնապատկեցին իրենց առավելությունը։ Ֆանտաստիկ գործեց Գոնսալո Գրեգորիուն, որը հարվածային դիրք դուրս գալով, հրաշալի փոխանցում կատարեց Վիրջիլ Պինսոնին, ու վերջինս դիպուկ հարվածով հաշիվը դարձրեց 2։0։
Հանդիպման վերջնամասում հյուրերը համեմատաբար ակտիվացան, բայց գրավել «Նոայի» դարպասը այս խաղում չեխական թիմին վիճակված չէր։
Երկրորդ տուրի իր հանդիպումը «Նոան» անցկացնելու է հոկտեմբերի 24-ին, այդ օրը մեր թիմը Ավստրիայում մրցելու է «Ռապիդի» հետ։