ԵՐԵՎԱՆ, 3 հոկտեմբերի – Sputnik. Հանրային հեռուստաընկերությունը վաղուց հանրային չէ, փաշինյանական է: Այդ մասին լրագրողների հետ զրույցում ասաց ՀՀԿ խոսնակ Արմեն Աշոտյանը՝ անդրադառնալով Հանրային հեռուստաընկերության ուղիղ եթերում Բագրատ Սրբազանի ուղերձին ու, ընդհանրապես երեկ տեղի ունեցածին։
Ավելի վաղ հայտնել էինք, որ Սրբազան շարժման մասնակիցները երեկ Հանրապետության հրապարակում անցկացված հանրահավաքից հետո երթով հասան Հանրային հեռուստաընկերություն` պահանջելով ուղիղ եթեր։ Նրանց սկզբում դիմավորեց ոստիկանական խիտ պատնեշը, ապա ընդառաջ դուրս եկավ հեռուստաընկերության տնօրեն Հովհաննես Մովսիսյանն` առաջարկելով հարցազրույց Պետրոս Ղազարյանի հետ։
«Ես զարմանում եմ ձեր զարմանալու վրա. ամեն տեղ, որտեղ հասարակությունը ուզում է իր արդարացի պահանջը ձևակերպել, առաջանում են ոստիկանական շարքեր։ Դա կարող է լինել համալսարան, բուհական միջավայր, հեռուստաընկերություն: Այդ հեռուստաընկերությունը վաղուց հանրային չէ, փաշինյանական է»,– ասաց Աշոտյանը:
Նա չհերքեց, որ իրենց ղեկավարման ժամանակ ևս Հ1–ը լիարժեք անկախ չի եղել, բայց այսօրվա պես խայտառակություններ չեն եղել։ «Հիշում եմ, որ Նիկոլը էկրաններից չէր իջնում մեր ժամանակ, ի դեպ, բոլոր հաղորդումներում կար` իմիջային, ժամանցային, քաղաքական: Եթե չեմ սխալվում` անգամ ես եմ իմ հաղորդմանը նրան հյուրընկալել»,– տեղեկացրեց Աշոտյանը։
Անդրադառնալով Պետրոս Ղազարյանին` Աշոտյանը նշեց, որ երեկվա հարցազրույցի ժամանակ նա ստում էր. 2018 թվականի դեկտեմբերից հետո Աշոտյանը մի քանի անգամ նրան դիմել է, որ իրեն հրավիրի հարցազրույցի:
«Կներեք անհամեստությանս համար, բայց ես ամենավերջին մարդը չեմ հայաստանյան քաղաքական դաշտում, որին 5 տարի չեն հրավիրել եթեր: Հ1-ում կա «սև ցուցակ», ու Սրբազանի դժգոհությունները մեղմ էին ու իրավացի»,– ընդգծեց Աշոտյանը:
Հավելենք, որ Հանրայինի` 25–րոպեանոց ուղիղ եթերի ժամանակ Բագրատ սրբազանը հանդես եկավ 12 րոպեանոց ուղերձով, իսկ ապա նույն տևողությամբ հարցազրույց տվեց Պետրոս Ղազարյանին։