Կառավարության նիստից հետո Պետական եկամուտների կոմիտեի նախագահ Ռուստամ Բադասյանը լրագրողների հետ ճեպազրույցում կարծիք է հայտնել, որ արդարադատության նախկին նախարար Գրիգոր Մինասյանի պաշտոնավարման ընթացքում արդարատատության ոլորտում բազմաթիվ դրական տեղաշարժեր են եղել։
Հարցին, թե այդ դեպքում ինչո՞ւ ՔՊ-ի մի խումբ պատգամավորներ որոշեցին ստորագրահավաք սկսել նրա դեմ, Բադասյանը պատասխանել է․ «Ես չեմ կարծում, որ իրավասու եմ որևէ կերպ մեկնաբանել ՔՊ խմբակցության պատգամավորների դիրքորոշումը»։
Բադասյանն ասել է, որ մտավախություն չունի, որ իր դեմ էլ նման ստորագրահավաք կլինի։ «Եթե պագամավորները դժգոհ են լինում որևէ մեկի աշխատանքից, միշտ ասում են դրա մասին, քննարկումներ են տեղի ունենում»․-ասել է Բադասյանը։
Երեկ պաշտոնանկ արվեցին արդարադատության նախարար Գրիգոր Մինասյանն ու փոխնախարար Սիրվարդ Գևորգյանը։ Մինասյանի դեմ ՔՊ-ում ստորագրահավաք էր սկսվել, ինչից հետո նախարարը հրաժարական ներկայացրեց, իսկ Սիրվարդ Գևորգյանին քննադատում էին Հանրապետության նախկին նախագահ Ռոբերտ Քոչարյանի դստեր հետ մտերմության մեջ։