ԵՐԵՎԱՆ, 1 հոկտեմբերի – Sputnik. ՀՀ իշխանությունները լիովին երաշխավորում են իր տարածքով մարդկանց, տրանսպորտային միջոցների ու ապրանքների ազատ և անվտանգ տեղաշարժը։ Այդ մասին Եվրասիական միջկառավարական խորհրդի ընդլայնված կազմով նիստի ժամանակ հայտարարեց ՀՀ վարչապետ Նիկոլ Փաշինյանը։
Տրանսպորտային ենթակառուցվածքների զարգացման ենթատեքստում Փաշինյանն այսպիսով ևս մեկ անգամ հիշեցրեց ՀՀ կառավարության նախաձեռնած «Խաղաղության խաչմերուկ» ծրագիրը։
«Այն բոլոր պնդումները, թե ՀՀ–ն ինչ–որ մի տեղ, ինչ–որ մի փաստաթղթում իբր թե համաձայնել է, որ 3–րդ երկրները պետք է ապահովեն իր տարածքի ենթակառուցվածքների անվտանգությունը, դրանք ընդամենն իրականության խեղաթյուրումներ են։Նաև ուզում եմ ավելացնել, որ նույնպիսի խեղաթյուրումներ են այն պնդումները, թե իբր ՀՀ–ն համաձայնել է ենթակառուցվածքների համար իր ինքնիշխանության որոշ սահմանափակումների»,– ընդգծեց նա։
ՀՀ վարչապետը նիստի ժամանակ անդրադարձավ նաև էներգակիրների մեկ միասնական համակարգի ստեղծմանը` նշելով, որ դրա ձգձումը զգալիորեն դանդաղեցնում է միության անդամ երկրների տնտեսությունների զարգացումը, որի տեմպերը կարող էին լինել շատ ավելի բարձր, քան հիմա են։
Նա նաև ավելացրեց, որ հայկական կողմը առաջնահերթ նշանակություն է տալիս 3–րդ երկրների հետ ազատ առևտրի համաձայնագրերի կնքման բանակցություններին, որոնք տրամադրված են փոխշահավետ համագործակցության։
Այդ համատեքստում նա հիշեցրեց, որ այս նիստի շրջանակում նախատեսվում է համատեղ միջացառումների` 2024–26 թթ. ծրագիրը ստորագրել ԵԱՏՄ և Ուզբեկստանի միջև, որը կնպաստի առևտրաշրջանառությանն ու տնտեսական համագործակցության զարգացմանը։
Փաշինյանը ողջունեց նաև ԵԱՏՄ նստաշրջանին մասնակից Իրանի պատվիրակությանը` ընդգծելով, որ Իրանի համագործակցությունը ԵԱՏՄ հետ միանշանակ ընդլայնում է համագործակցության շրջանակը։