ԵՐԵՎԱՆ, 1 հոկտեմբերի – Sputnik. Իրանը հույս ունի, որ հնարավորինս կարագացվի Իրանին ԵԱՏՄ դիտորդ–անդամի կարգավիճակի շնորհման գործընթացը և միության անդամ պետությունները կաջակցեն դրան։ Այս մասին Եվրասիական միջկառավարական խորհրդի ընդլայնված կազմով նիստի ժամանակ հայտարարեց Իրանի Իսլամական Հանրապետության փոխնախագահ Մոհամմադ Ռեզա Արեֆը։
«ԵԱՏՄ–ն, օրինակ, կարող է օգտագործել Իրանի տրանսպորտային ենթակառուցվածքների պոտենցիալը` դուրս գալու համար Պարսից ծոցի, Հարավային Ասիայի ավելի մեծ շուկաներ»,– հայտարարեց նա։
Փոխնախագահն ընդգծեց` Իրանն ապացուցել է, որ տարածաշրջանում հանդիսանում է վստահելի գործընկեր և ձգտում է երկկողմ հարաբերությունների խորացման քաղաքական, տնտեսական մակարդակներում։
«Մենք վստահ ենք, որ տնտեսության կայուն զարգացումը հիմնված է կառուցողական համագործակցության խորացման վրա տարածաշրջանի երկրների, ինչպես նաև այնպիսի կառույցների միջև, ինչպիսին ԵԱՏՄ–ն է»,– հայտարարեց Արեֆը։
Ըստ նրա` Իրանը պատրաստ է ավելի լուրջ դերակատարում ունենալ ԵԱՏՄ–ում` հաշվի առնելով միության 18 մլրդ դոլարի առևտրաշրջանառության պոտենցիալը և նավթի ու գազի նշանակալի պաշարները, տարանցիկ ուղիների առավելությունը, տեխնոլոգիայի և ինժեներիայի բնագավառում հնարավորությունները և այլն։
Հունիսի 19-ին Իրանի կառավարությունը հավանություն տվեց Եվրասիական տնտեսական միության և Իրանի Իսլամական Հանրապետության միջև ազատ առևտրի գոտու ստեղծման մասին համաձայնագրին, որը ստորագրվել էր դեռ անցած տարվա դեկտեմբերին Սանկտ Պետերբուրգում Եվրասիական տնտեսական բարձրագույն խորհրդի նիստում։ Ըստ մասնագետների՝ Իրանի հետ նոր համաձայնագիրը թույլ կտա 5-7 տարվա ընթացքում մատակարարումները հասցնել տարեկան 18-ից մինչև 20 միլիարդ դոլարի` 2022 թվականին գրանցված 6․2 միլիարդի փոխարեն։
2015 թվականին ստեղծված ԵԱՏՄ-ին անդամակցում են Հայաստանը, Բելառուսը, Ղազախստանը, Ղրղզստանը և Ռուսաստանը: