ԵՐԵՎԱՆ, 1 հոկտեմբերի – Sputnik․ Միջազգային գործընկերներն իրենք չեն հասկանում, թե ինչու է Ադրբեջանը հապաղում Հայաստանի հետ խաղաղության պայմանագրի ստորագրման հարցում։ Այսօր Ազգային ժողովում լրագրողներին ասաց ԱԺ նախագահ Ալեն Սիմոնյանը։
Հավելում է՝ մասնավոր զրույցներում արտասահմանցի գործընկերները հարցնում են Բաքվի պահվածքի հնարավոր պատճառների մասին։ Սիմոնյանը վստահեցնում է՝ արդեն հիմա կան երկրներ, որոնք պատրաստ են հարթակ տրամադրել ստորագրման համար, և այդ պատրաստակամությունը պետք է համարել նաև ուղերձ՝ վերջապես փաստաթուղթը ստորագրելու անհրաժեշտության մասին:
Քաղաքական գործչի խոսքից հետևում է, որ հայկական կողմը դեմ չէր լինի փաստաթղթի ստորագրմանը Բաքվում կայանալիք COP29 կլիմայական գագաթնաժողովի շրջանակներում: Բայց ընտրությունը Ադրբեջանինն է ։
«Եթե Ադրբեջանը ցանկանում է COP29-ը վերածել Հայաստան-Ադրբեջան խաղաղության պայմանագրի և գերիների ազատ արձակման մասին ելույթների ու նման միջոցառման, դա ընտրության հարց է»,- ասաց նա:
Ցանկության դեպքում Ադրբեջանի նախագահի աշխատակազմը մեկ ժամվա ընթացքում կարող է կապ հաստատել Երևանի հետ և հայտնել ստորագրման ժամը և վայրը: Նա հավելել է՝ գնդակը հիմա Ադրբեջանի դաշտում է, պետք է միայն քաղաքական կամք։
Հիշեցնենք` 2021 թվականին Ադրբեջանի նախագահ Իլհամ Ալիևը հայտարարեց Հայաստանի հետ խաղաղության պայմանագիր ստորագրելու պատրաստակամության մասին։ 2022 թվականի մարտին Բաքուն Երևանին փոխանցեց հարաբերությունների կարգավորման վերաբերյալ 5 կետից բաղկացած իր առաջարկը: Հայկական կողմը շտկումներ ավելացրեց և ուղարկեց իր տարբերակը։ Այդ ժամանակից ի վեր կողմերի միջև տարբեր մակարդակներով բանակցությունների մի քանի փուլ է եղել։
ՀՀ արտաքին գործերի նախարար Արարատ Միրզոյանը ՀՀ արտաքին գործերի նախարար Արարատ Միրզոյանը հոկտեմբերի 3-ին հայտնեց, որ Երևանի և Բաքվի միջև ընթանում է առաջարկների փոխանակման 6-րդ փուլը։
Հաջորդ օրը ՀՀ վարչապետ Նիկոլ Փաշինյանը հայտարարեց, որ երեք սկզբունք կա, որոնց շուրջ համաձայնության գալու դեպքում խաղաղության պայմանագիրը կստորագրվի։