ԵՐԵՎԱՆ, 1 հոկտեմբերի - Sputnik. Բելառուսն ու Ռուսաստանը չեն պատրաստվում գրավել Չեռնոբիլի ատոմակայանը: Այս մասին հայտարարել է Բելառուսի նախագահ Ալեքսանդր Լուկաշենկոն ՄԱԳԱՏԷ-ի գլխավոր տնօրեն Ռաֆայել Գրոսսիի հետ հանդիպման ժամանակ, փոխանցում է Sputnik Բելառուսը:
«Մենք տարատեսակ արկածների մեջ չենք մտնում։ Ես դա ասում եմ այն պատճառով, որ վերջին ժամանակներս մեր ուկրաինացի «ընկերներն» ու «բարեկամները» լրատվամիջոցներում շատ տեղ են հատկացնում Չեռնոբիլի ատոմակայանին։ Այդ տեղեկությունը ձեզ են հասցնում, թե իբր մենք ցանկանում ենք գրավել Չեռնոբիլի կայանը»,-ասել է Բելառուսի նախագահը։
Լուկաշենկոն հայտարարել է, որ Մինսկն ամեն ինչ կանի տարածաշրջանային միջուկային անվտանգությունն ապահովելու համար:
«Դուք պետք է իմանաք, որ մենք հավատարիմ ենք անվտանգությանն ու խաղաղությանը։ Մենք կանենք ամեն ինչ, ինչի ընդունակ ենք, ինչ կախված է մեզնից, որպեսզի ապահովենք տարածաշրջանային միջուկային անվտանգությունը։ Դրանում կարող եք չկասկածել»,-ասել է նա։
Բելառուսի ղեկավարը նշել է, որ Մինսկին տպավորում է ՄԱԳԱՏԷ-ի աշխատանքը, հատկապես այն, ինչ վերաբերում է Զապորոժիեի եւ Կուրսկի ԱԷԿ-ների անվտանգությանը:
Ռաֆայել Գրոսսին ժամանել է Բելառուս՝ Մինսկում բարձր մակարդակի հանդիպումների և Օստրովցի ատոմակայան այցելելու համար: