ԵՐԵՎԱՆ, 1 հոկտեմբերի – Sputnik․ Ղրղզստանի կառավարության ղեկավար Ակիլբեկ Ժապարովն առաջարկել է միասնական հարթակ ստեղծել ԵԱՏՄ երկրներում բժշկական զննության արդյունքների փոխադարձ ճանաչման համար: Այս մասին նա հայտարարել է այսօր Երևանում կայացած Եվրասիական տնտեսական համաժողովի լիագումար նիստում։
«Թվային տեխնոլոգիաների ակտիվ ներդրման միջոցով մենք կարող ենք վերացնել մեր միջև աշխարհագրական, ֆիզիկական սահմանները, նոր հեռանկարներ բացել տնտեսական և սոցիալական զարգացման համար»,- ասել է Ժապարովը:
Նրա խոսքով՝ թվային փոխակերպումը կարևոր է ապրանքների, կապիտալների, ծառայությունների և աշխատանքային ռեսուրսների ազատ տեղաշարժի խոչընդոտները վերացնելու համար։ Ղրղզստանի նախաձեռնություններից մեկն է արտագնա աշխատողների բժշկական զննումների փոխադարձ ճանաչման համակարգի ստեղծումը։ Դա թույլ կտա նվազեցնել ֆինանսական և ժամանակավոր ծախսերը միգրանտների համար, որոնք այժմ ստիպված են կրկնակի ստուգումներ անցնել միության այլ երկիր ժամանելիս։ Այս համակարգի հիմքը թվայնացումն է։
Ժապարովն առաջարկել է նաև օգտագործել «Ճամփորդի՛ր առանց Covid-19» բջջային հավելվածի հաջողված փորձը, որն ապացուցել է, որ թվային լուծումների միջոցով հնարավոր է ապահովել բժշկական տվյալների հավաստիությունը, կանխել դրանց կեղծումը և արագացնել ստուգման գործընթացը:
«Առաջարկում եմ դիտարկել տվյալների փոխանակման միասնական հարթակ ստեղծելու հնարավորությունը, որտեղ վստահելի բժշկական կազմակերպությունները կկարողանան ներբեռնել հետազոտությունների արդյունքները, ու դրանք հասանելի կլինեն այլ երկրների պետական մարմինների համար»,- նշել է Ժապարովը:
Նրա խոսքով՝ դա կստեղծի վստահության ընդհանուր միջավայր բժշկական սպասարկման ոլորտում և կարևոր քայլ կդառնա տարածաշրջանում աշխատուժի տեղաշարժը հեշտացնելու և հետագա ինտեգրման համար։