ԵՐԵՎԱՆ, 30 սեպտեմբերի – Sputnik. Իսրայելի պաշտպանության նախարար Յոավ Գալանտը հայտարարել է, որ առաջիկայում կսկսվի «Հզբոլլահ» լիբանանյան շարժման հետ պատերազմի նոր փուլը, որը «առանցքային գործոն կդառնա երկրի հյուսիսում անվտանգության հետ կապված իրավիճակի փոփոխման առումով»։ Այս մասին հայտնել է ՌԻԱ Նովոստին` հղում անելով Ynet պորտալին։
The Washington Post–ն ավելի վաղ հղում անելով ամերիկացի պաշտոնյային, հայտնել է, որ Իսրայելը կարող է Լիբանանում սահմանափակ ցամաքային գործողություն սկսել առաջիկա ժամերին։
««Հզբոլլահի» հետ պատերազմում շուտով կսկսվի հաջորդ փուլը` դա կարևոր քայլ կդառնա անվտանգության հետ կապված իրավիճակի բարելավման առումով, ինչը թույլ կտա մեզ իրենց տներ վերադարձնել հյուսիսի բնակիչներին», – Ynet–ը մեջբերում է Գալանտին։
Նախարարն ընգծել է նաև, որ նպատակին հասնելու համար կստեղծվեն անհրաժեշտ բոլոր պայմանները։
Իսրայելի և «Հզբոլլահի» միջև հակամարտության սրացումը սկսվել է սեպտեմբերի 17-ին և 18-ին Լիբանանում կապի սարքերի մի շարք պայթյուններից հետո: Շիա շարժումը միջադեպերի համար մեղադրել Է Իսրայելին, թեև հրեական պետության իշխանությունները պաշտոնական մեկնաբանություններ չեն տվել՝ հայտարարելով միայն հյուսիսային սահմանին ակտիվության ուժեղացման մասին:
Սեպտեմբերի 23-ին Իսրայելը սկսել է «Հյուսիսի նետեր» գործողությունը, որի շրջանակներում հարվածներ են հասցվել Լիբանանում «Հզբոլլահի» ռազմական օբյեկտներին: Սեպտեմբերի 27-ին Բեյրութին հասցված հարվածներից մեկի ժամանակ սպանվել է «Հզբոլլահի» գլխավոր քարտուղար Հասան Նասրուլլան: