ԵՐԵՎԱՆ, 30 սեպտեմբերի – Sputnik. 2024 թվականի հունվար–հուլիս ամիսներին ԵԱՏՄ արդյունաբերական արտադրանքի ծավալը կազմել է 104.8 տոկոս։ Այդ մասին Երևանում ԵԱՏՄ 3–րդ համաժողովի ժամանակ ասաց ԵՏՀ արդյունաբերության և ագրոարդյունաբերական համալիրի հարցերով կոլեգիայի անդամ (նախարար) Գոհար Բարսեղյանը:
Ինչ վերաբերում է վերամշակող արդյունաբերությանը, ապա նա նշեց, որ ծավալը ԵԱՏՄ–ում 2024 թվականի հունվար–հուլիսին աճել է 8.4 տոկոսով։ Բարսեղյանի խոսքով` աճ նկատվել է անդամ բոլոր երկրներում, սակայն առաջատարը ՀՀ–ն է։
Մասնավորապես` ՀՀ–ում վերամշակող արդյունաբերության ծավալը կազմել է 23.6 տոկոս, ՌԴ–ում 8.6 տոկոս, Բելառուսում` 7.7 տոկոս, Ղազախստանում` 5 տոկոս։
Նա ընդգծեց, որ միջազգային համագործակցության հատվածում հիմնական շեշտադրումն արվում է այնպիսի ուղղությունների վրա, ինչպիսիք են ներդրումների ներգրավումը արտադրական սարքավորումների արդիականացումը, առաջատար տեխնոլոգիաների փոխշահավետ տեղակայումը, փոխշահավետ բազմակողմանի համագործակցությունը։
«ԵԱՏՄ հիմնական կապիտալի 10 տոկոսանոց աճ ենք նկատում 2023 թվականի ամբողջական և 2024 թվականին 1–ին կիսամյակի տվյալներով»,– նշեց Բարսեղյանը։
Նա տեղեկացրեց, որ վաղը ԵԱՏՄ անդամ երկրների կառավարությունների ղեկավարների հաստատմանն է ներկայացվելու ռազմավարական կարևոր մի փաստաթուղթ, որտեղ ներառված կլինեն արդյունաբերական համագործակցության հիմնական ուղղությունները մինչև 2030 թվականը։
«Սա ռազմավարական բազա կլինի հնգամյա աշխատանքի համար` կոնկրետ մեխանիզմներով ու իրականացման քայլերով։ Ես հույս ունեմ, որ այդ փաստաթուղթը վաղը կհաստատվի, որի հիմքում են նաև բիզնեսի առաջարկները»,– նշեց նա։
Բարսեղյանի խոսքով` թղթի վրա ամեն ինչ գեղեցիկ է, սակայն իրական կյանքում` շատ ավելի բարդ. ԵԱՏՄ–ում որոշումները կոնսենսուսով են ընդունվում, և արդյունքում գործընթացները երբեմն ձգձգվում են։
«Մենք հասկանում ենք, որ գործ ունենք բիզնեսի հետ, իսկ բիզնեսը սպասել չի սիրում։ Դրա համար պետական հատվածի հետ մտածում ենք լավարկելու, առկա մեխանիզմերը կատարելագործելու մասին»,– ասաց Բարսեղյանը։
Նշենք, որ Երևանում ընթանում են Եվրասիական տնտեսական համաժողովը և Եվրասիական միջկառավարական խորհրդի նիստը: Միջոցառումները կշարունակվեն նաև հոկտեմբերի 1-ին։