Մայր տաճարի վերաօծման արարողությունը սկսվեց. Փաշինյանն ու Սիմոնյանը ներկա են

ԵՐԵՎԱՆ, 29 սեպտեմբերի – Sputnik. Էջմիածնի Մայր տաճարի վերաօծման արարողությունը սկսվեց Ամենայն հայոց կաթողիկոս Գարեգին Երկրորդի աղոթքով՝ «Հայր մեր»-ով։

Չնայած եկեղեցու հետ խորը տարաձայնություններին՝ իշխանության ներկայացուցիչները՝ ՀՀ վարչապետի, ՀՀ նախագահի և ԱԺ խոսնակի հետ միասին մասնակցում են Մայր տաճարի վերաօծման արարողությանը, որն առաջին անգամն է 4-րդ դարից ի վեր։

Նիկոլ Փաշինյանը Մայր տաճար եկավ տիկնոջ` Աննա Հակոբյանի և ՀՀ նախագահ Վահագն Խաչատուրյանի հետ։

Առավոտից Երևանից Էջմիածին ճանապարհին բազմաթիվ ոստիկաններ են շարվել։ Sputnik Արմենիայի թղթակիցը տեղից հայտնում է, որ լրագրողներին զգուշացրել են, որ անվտանգության ծառայությունը նրանց թույլ չի տա տաճար մտնել, չնայած ավելի վաղ նախատեսվում էր եկեղեցու ներսում նկարահանումներ կատարել:

Մուտքը Էջմիածնի Մայր տաճար միայն հրավիրատոմսերով է։ 500 հրավիրյալների թվում են Կ. Պոլսի Հայոց պատրիարք Սահակ արքեպիսկոպոս Մաշալյանը, Ռուս Ուղղափառ եկեղեցու պատվիրակության ղեկավար՝ Սմոլենսկի և Դորոգոբուժսկի միտրոպոլիտ Իսիդորը, ԱԺ նախկին նախագահ Արա Բաբլոյանը, ՀՀ նախկին վարչապետ Կարեն Կարապետյանը, դիվանագիտական կորպուսի ներկայացուցիչներ, որոնց թվում է նաև Հայաստանում ՌԴ դեսպան Սերգեյ Կոպիրկինը:

Մայր տաճարի մուտքի մոտ վաղ առավոտից մարդկանց կուտակումներ են։

Հիշեցնենք, որ սեպտեմբերի 28-ին Մյուռոնօրհնեքն էր։

Սեպտեմբերի 27-ին էլ տեղի է ունեցել Մայր տաճարի Նավակատիքը` դռնբացեքը, նաև օծվել են եկեղեցու սյուները։