ԵՐԵՎԱՆ, 26 սեպտեմբերի – Sputnik. ՀՀ էկոնոմիկայի նախարար Գևորգ Պապոյանը մամուլից է տեղեկացել ՀՀ արդարադատության նախարար Գրիգոր Մինասյանին պաշտոնանկ անելու համար ստորագրահավաք սկսելու մասին։ Այս մասին Պապոյանը հայտնեց կառավարության նիստից հետո լրագրողների հետ զրույցում։
Ավելի վաղ հայտնել էինք, որ ՔՊ–ական որոշ պատգամավորներ ստորագրահավաք են սկսել Գրիգոր Մինասյանին պաշտոնանկ անելու դիմում Նիկոլ Փաշինյանին ներկայացնելու համար։ Այսօր էլ ԶԼՄ–ներում տեղեկություններ էին շրջանառվում, որ նախաձեռնողը ՔՊ–ական պատգամավոր Արփի Դավոյանն է։ Նշվում է, որ պատճառներից մեկը ՀՀ երրորդ նախագահ Սերժ Սարգսյանի փեսա` Միքայել Մինասյանի եղբայրը լինելն է։
«Ես լավ եմ գնահատում նրա աշխատանքը։ Դժգոհություններ չունեմ։ Քաղաքացիական պայմանագիր» կուսակցությունում արժեքների առումով կա խոսքի և կարծիքների ազատություն։ Մարդիկ ինձնից էլ կարող են գոհ կամ դժգոհ լինել»,– նշեց Պապոյանը։
Անդրադառնալով ՔՊ վերջին նիստի ժամանակ կոռուպցիոն հարցերի վերաբերյալ քննարկումներին` Պապոյանն ասաց` անձի վերաբերյալ խոսք չի եղել։ Վստահեցրեց` կառավարության գործունեության բարելավմանն ուղղված քննարկումներ և խոսակցություններ են եղել։
Հարցին, թե ինչու են 2 տարի անց Գրիգոր Մինասյանի` Միքայել Մինասյանի եղբայր լինելու փաստի մասին հիշել, Պապոյանը նշեց` իր համար անցանկալի է խոսել նման թեմաներով, քանի որ իր ժամանակն անիմաստ վատնում են։
Հիշեցնենք, որ սեպտեմբերի 25-ին «Հրապարակ» թերթը գրել էր նախորդ շաբաթ կուսակցական հավաքի ժամանակ գրեթե բոլոր կուսակցականները ելույթ են ունեցել ընդդեմ նախարարի` խայտառակություն համարելով այն, որ Սերժ Սարգսյանի փեսա Միքայել Մինասյանի հարազատ եղբորը նշանակել են բարձր պաշտոնի, իսկ նա էլ իր հերթին այլ նախկինների է նշանակում բարձր պաշտոնների։
Նշենք, որ կուսակցության կանոնադրության համաձայն՝ ցանկացած պաշտոնյայի պաշտոնանկության հարցը քննարկման առարկա կարող է դառնալ, եթե 1/3-ը դիմում է ՔՊ ղեկավարին։ Այսինքն՝ 24 ստորագրություն հավաքելու դեպքում նախարարին հեռացնելու հարցը կքննարկվի, բայց վերջին խոսքը կլինի Փաշինյանինը։