ԵՐԵՎԱՆ, 26 սեպտեմբերի – Sputnik. ՀՀ կառավարությունը 1 անձից գնում կկատարի Ակադեմիական քաղաքի խորհրդատվական ծառայությունների համար։ Համապատասխան որոշումն ընդունվեց կառավարության այսօրվա նիստի ժամանակ։
«Այսպիսով, ՀՀ ԿԳՄՍ նախարարության ենթակա բարձրագույն կրթության և գիտության կոմիտեին կթույլատրվի մեկ անձից գնման ընթացակարգով Ակադեմիական քաղաքը նախագծող «GMP International GmbH Architects and Engineers» ընկերությունից գնել Ակադեմիական քաղաքի երկարատև հաջողության ձևավորմանը միտված խորհրդատվական ծառայություններ, ինչը հնարավորություն կտա պատշաճ կերպով ապահովելու ծրագրի հետ կապված բնականոն աշխատանքները և շարունակական զարգացումը»,– ասված է որոշման հիմնավորման մեջ:
Նախագծով այս ընկերությունը հնարավորություն կունենա մշակելու Ակադեմիական քաղաքի կառավարման մոդել և ձեռք բերել Ակադեմիական քաղաքի տեխնիկական կլաստերի ինտեգրված ռազմավարություն ու կառավարման համակարգ ձևավորելու ծառայություններ։
Կառավարությունից պատճառաբանել են, թե ինչու են դիմել մեկ անձից գնման ընթացակարգին. ըստ գործադիր մարմնի` դա պայմանավորված է միջազգային բարձր վարկանիշ և ծրագրի իրականացման համար անհրաժեշտ բաղադրիչների մշակման բացառիկ և աննախադեպ փորձ ունեցող ընկերություններ ներգրավելու պահանջով։
Նշենք, որ Ակադեմիական քաղաքը նախագծող «GMP International GmbH Architects and Engineers» ընկերության փոխտնօրեն Թոբիաս Քեյլը հուլիսի 9–ին հայտարարել էր, որ Հայաստանում կառուցվելիք Ակադեմիական քաղաքի առաջին շենքը պատրաստ կլինի մինչև 2029 թվականը։
Հիշեցնենք` իշխանությունը նախատեսում է Ակադեմիական քաղաք տեղափոխել բուհերն ու գիտական ինստիտուտները՝ դրանց հիման վրա ստեղծելով կլաստերներ։
Ակադեմիական քաղաքի համար կհատկացվի Երևանի 17-րդ թաղամասն ու «Հայֆիլմի» տարածքը։