ԵՐԵՎԱՆ, 25 սեպտեմբերի - Sputnik. 2024 թվականի առաջին վեց ամսում Չինաստանից Հայաստան է ժամանել 11,5 հազար զբոսաշրջիկ։ Այս ցուցանիշը 1,1 անգամ ավելի է 2023 թվականի համանման ցուցանիշից։ Այս մասին Հայաստանում Չինաստանի գործերի ժամանակավոր հավատարմատար Մին Չենը հայտարարել է այսօր` ՉԺՀ կազմավորման 75-ամյակին նվիրված ընդունելության ժամանակ։
Դիվանագետը հիշեցրել է, որ սեպտեմբերի 3-ից մեկնարկել են Ուրումչի-Երևան ուղիղ չվերթերը:
Նա նաև նշել է, որ տարեցտարի Հայաստանում չինարեն ուսումնասիրողների թիվն աճում է։
Իսկ երկկողմ առևտրի ծավալը, Չենի խոսքով, այս տարվա առաջին կիսամյակում գերազանցել է 1,4 մլրդ դոլարը. 2023 թվականի համանման ցուցանիշի համեմատ դա 40 տոկոսով ավելի է։
Հայաստանում ՉԺՀ գործերի ժամանակավոր հավատարմատարը վստահեցրել է, որ Չինաստանի կառավարությունն աջակցում է չինական ընկերություններին հայկական տնտեսության մեջ ներդրումների հարցում։