ԵՐԵՎԱՆ, 21 սեպտեմբերի – Sputnik․ Հայաստանի Հանրապետությունն ու հայ ժողովուրդը ծանր փորձություններ հաղթահարելով՝ կարողացել են ամրանալ ու ոտքի կանգնել՝ գտնելով ելքեր անելանելի թվացող իրավիճակներից: Այս մասին ասված է ՀՀ նախագահ Վահագն Խաչատուրյանի՝ Անկախության օրվա կապակցությամբ հղած շնորհավորական ուղերձում։
«Բոլորիս համար անկախությունը ոչ թե բարեհունչ գաղափար կամ ինքնանպատակ է, այլ շարունակական շարժում, պայքար սեփական կամքով մեր ճակատագիրը կերտելու, մեր հայրենիքի ու պետության ձևն ու բնույթը ինքնուրույն որոշելու համար, որի վերջնական նպատակը ազատ, պատասխանատու, անընդհատ զարգացող և արարող մարդն ու քաղաքացին է»,- նշել է նա։
Խաչատուրյանի խոսքով` ինչպես և 33 տարի առաջ, հիմա էլ մեր պետության առաջ բազմաթիվ մարտահրավեր են։ Բայց անցած տասնամյակները վկայում են նաև, որ ցանկացած խոչընդոտ հաղթահարելի է միասնականությամբ, համերաշխությամբ ու վճռականությամբ:
ՀՀ նախագահը վստահություն է հայտնել, որ ՀՀ քաղաքացիների հավաքական ջանքով կկերտվի մեր երազանքների Հայաստանը:
Հիշեցնենք` այսօր Հայաստանի Հանրապետության անկախության 33-րդ տարեդարձն է։ 1991 թվականի այս օրը Հայաստանում տեղի ունեցավ հանրաքվե, և քաղաքացիների 95 տոկոսը քվեարկեց անկախ պետություն դառնալու օգտին։