ԵՐԵՎԱՆ, 21 սեպտեմբերի – Sputnik․ Փաստաբանները ոչ իրավաչափ են համարում «Սև հովազ» ռազմահայրենասիրական ՀԿ–ի նախագահ Սերոբ Գասպարյանի կալանավորումը։ Նրանք հայտարարություն են տարածել։
«Մեղադրանքը ապօրինի է, չի բխում գործով ձեռք բերված փաստական տվյալներից, իսկ խափանման միջոց կալանավորման համար առկա չեն պատշաճ ռիսկեր։ Քրեական հետապնդումը համարում ենք ոչ իրավաչափ»,- նշել է փաստաբանական թիմը։
Միաժամանակ փաստաբաններ էրիկ Ալեքսանյանը, Գուրգեն Գրիգորյանը, Ալեքսանդր Կոչուբաևը չեն շտապում մեղադրանքի մեջ քաղաքական կոմպոնենտ տեսնել։
«Մեր ընկալմամբ` իրավապահ մարմինների առանձին պաշտոնյաներ ցանկացել են ընդգծել իրենց ծառայողական նվիրվածությունը և քաղաքական իշխանության համար «բացահայտել են» իշխանության յուրացման հանցանքի նախապատրաստություն»,- ասված է հայտարարության մեջ։
Նրանք ընդգծել են, որ գործի քննությունը չխոչընդոտելու համար սա առայժմ իրենց միակ հայտարարությունն է։
Հիշեցնենք՝ սեպտեմբերի 18-ին ՀՀ քննչական կոմիտեն հայտնեց, որ ՀՀ իշխանությունը յուրացնելու նախապատրաստության համար 7 անձի նկատմամբ քրեական հետապնդում է հարուցվել, որոնցից 4–ի նկատմամբ հայտարարվել է հետախուզում, իսկ 3–ը կալանավորվել են։
Ավելի ուշ հայտնի դարձավ, որ կալանավորվածներից մեկը «Սև հովազ» ջոկատի հրամանատար Սերոբ Գասպարյանն է։ Նշենք, որ նա ջոկատի հրամանատարությունը ստանձնել է եղբոր՝ Ռուստամ Գասպարյանի մահից հետո։ Վերջինս և նրա որդին զոհվել են 44-օրյա պատերազմի ժամանակ։