ԵՐԵՎԱՆ, 19 սեպտեմբերի – Sputnik. Հնդկաստանը և Ռուսաստանն ակտիվ բանակցություններ են վարում նոր համաձայնագրի կնքման շուրջ, որն ուղղված է ներդրումների և գործարար համագործակցության ուժեղացմանը։ Այս մասին հաղորդում է ՌԻԱ Նովոստին` վկայակոչելով Hindustan Times թերթը։
Նշվում է, որ բանակցություններն անցկացվել են հուլիսի 18-19-ը` առցանց ֆորմատով։ Դրանք տեղի են ունեցել այն բանից հետո, երբ հարցը քննարկել են Հնդկաստանի վարչապետ Նարենդրա Մոդին և Ռուսաստանի նախագահ Վլադիմիր Պուտինը։ Երկու պետությունն էլ պայմանավորվել են արագացնել փոխադարձ ներդրումների խրախուսման և պաշտպանության մասին համաձայնագրի ստորագրումը։
Ինչպես նշում են աղբյուրները, նոր պայմանագիրը կբարելավվի ներդրումային հնարավորությունները երկու երկրների համար։ Հնդկաստանը, օրինակ, հետաքրքրություն է ցուցաբերում Ռուսաստանում նավթի և գազի արյդունահանման նկատմամբ, իսկ Ռուսաստանը հետաքրքրված է հնդկական արդյունահանող արդյունաբերության զարգացմամբ։ Հնդկաստանը նախատեսում է նաև ներդրումներ կատարել ռուսական Հեռավոր Արևելքի, Հյուսիսային ծովային ճանապարհի և նավաշինության զարգացման մեջ, ներառյալ ծովային երթուղիների համար սառցահատների կառուցումը։
Ռուսաստանն իր հերթին ձգտում է իր առևտրային ավելցուկի մի մասը ներդնել հնդկական տնտեսության մեջ` հաշվի առնելով էներգետիկայի ենթակառուցվածքների, նավթաքիմիական և շինարարության ոլորտները։ Երկու կողմն էլ կարևորում են այնպիսի ոլորտներ, ինչպիսիք են դեղագործությունը, մետալուրգիան և բանկային գործունեությունը։
Ռուսաստանը հնդկական ընկերություններին հրավիրում է մասնակցելու Հեռավոր Արևելքում բարձրտեխնոլոգիական նախագծերում, իսկ Հնդկաստանը ռուս ներդրողներին առաջարկում է արդյունաբերական միջանցքի ծրագրի շրջանակներում արտադրական հզորություններ ստեղծել։
Երկու երկրների միջև առևտրաշրջանառությունը 2023-2024 թթ. աճել է մինչև 65 մլրդ դոլար, ինչը կրկնակի գերազանցում է նախկինում սահմանված նպատակը։ Ռուսաստանի և Հնդկաստանի ղեկավարները խնդիր են դրել մինչև 2030 թվականը այդ ցուցանիշը հասցնել 100 մլրդ դոլարի։