ԵՐԵՎԱՆ, 18 սեպտեմբերի – Sputnik. Վիզաների ազատականացումը չի բերի արտագաղթային մեծ երևույթների։ Այդ մասին հայտարարեց ՀՀ վարչապետ Նիկոլ Փաշինյանը Համաշխարհային հայկական երկրորդ գագաթնաժողովի ժամանակ:
Նա հիշեցրեց, որ ԵՄ հետ վիզաների ազատականացման հետ կապված բանակցություններն արդեն պաշտոնապես մեկնարկել են։
Փաշինյանը տեղեկացրեց, որ բանակցությունների մեկնարկից առաջ ուսումնասիրություններ են արել, թե այլ երկրները, որոնք վիզայի ազատականացման քաղաքականություն են որդեգրել, ինչքանո՞վ է այնտեղ արտագաղթի ալիք բարձրացել։
«Վրաստանի օրինակը բերեմ, որը նաև մեզ համար մոտիկ հարևան է, այնտեղ արտագաղթային մեծ երևույթներ չեն նկատվում վիզաների ազատականացումից հետո։ Ընդհակառակը, երբ մարդիկ արձանագրում են, որ ազատորեն շատ մեծ հնարավորություններ ունեն գնալ–գալու, այդ ժամանակ գնալ–մնալու ցանկությունն ավելի է փոքրանում»,– վստահեցրեց վարչապետը։
Ըստ նրա` հիմա ԵՄ–ում, ԱՄՆ–ում կան հազարավոր մարդիկ, որոնք չեն վերադառնում Հայաստան, քանի որ դժվարությամբ են հասել այնտեղ, իսկ վերադառնալու դեպքում այլևս չեն կարողանալու գնալ։
«Մեր սահմանները բացելուց անընդհատ վախենալ և անընդհատ կրել սահմանները փակ լինելու հետևանքները... Եթե մենք ունենք նախագիծ, որը մեզ միավորում է` որպես պետություն, որպես հանրություն, այդ խնդիրները չեն լինի»,– նշեց նա։
Նա չժխտեց, որ այսօր էլ ՀՀ–ում կա արտագաղթային մթնոլորտ, որի հիմնական պատճառն ապագայի անորոշությունների ծավալն է, մենաշնորհները, որոնք պետք է նվազեցնել։
Հիշեցնենք` Եվրոպական միության խորհուրդը հուլիսի 22-ին հավանություն է տվել ՀՀ-ի հետ վիզաների ազատականացման երկխոսության մեկնարկին։ Իսկ սեպտեմբերի 9-ին ՀՀ փոխվարչապետ Մհեր Գրիգորյանը հայտարարեց Եվրամիության հետ վիզաների ազատականացման շուրջ երկխոսության պաշտոնական մեկնարկի մասին: