ԵՐԵՎԱՆ, 18 սեպտեմբերի - Sputnik. Հայաստանը հույս ունի, որ ինչ-որ պահի կսկսի սփյուռքի հարցերով հանձնակատարներ նշանակել Ռուսաստանում։ Այս մասին Երկրորդ համաշխարհային հայկական համաժողովի շրջանակում Sputnik Արմենիային ասաց ՀՀ վարչապետին առընթեր սփյուռքի գործերի գլխավոր հանձնակատար Զարեհ Սինանյանը։
Նրա խոսքով՝ սփյուռքի գործերով ինստիտուտի ստեղծման մասին օրենքի ընդունումից հետո հանձնակատարներ նշանակելու առաջին քայլերն իրականացվել են Ռուսաստանի հետ:
«Այդ հարցը քննարկվել է երկու երկրների ղեկավարների, անվտանգության գերատեսչությունների ղեկավարների մակարդակով։ Որևէ այլ երկրի հետ նման մակարդակի աշխատանք չի կատարվել», - ասաց Սինանյանը։
Նա նշեց, որ վերջին իրադարձությունների և Երևանի ու Մոսկվայի հարաբերությունների ֆոնին՝ գործընթացը փոքր-ինչ դանդաղել է։ Սինանյանը հույս հայտնեց, որ ինչ-որ պահի Հայաստանը ՌԴ-ում նույնպես կնշանակի սփյուռքի գործերի հանձնակատար:
Ընդհանուր առմամբ, այս ինստիտուտի ներդրումից ի վեր Հայաստանը սփյուռքի հարցերով 17 հանձնակատար է նշանակել՝ առավելապես ԵՄ երկրներում։ Արդեն որոշվել է ԱՄՆ-ում առաջին հանձնակատարի թեկնածությունը։
Սինանյանը պարզաբանեց, որ նշանակված բոլոր հանձնակատարները հայ համայնքներում հայտնի գործիչներ են։ Յուրաքանչյուր ամիս գրասենյակի ներկայացուցիչները կապ են հաստատում նրանց հետ, քննարկում ընթացիկ գործերը, կայացնում որոշումներ:
Նա նաև ընդգծեց, որ հանձնակատարների ինստիտուտը ձևավորման փուլում է:
Ինչ վերաբերում է հայրենադարձության և ինտեգրման կենտրոնին, ապա Սինանյանն ընդգծեց, որ այն ակտիվ գործում է: Կենտրոնի աշխատակիցները ծառայությունների լայն շրջանակ են մատուցում ինչպես հայրենադարձներին, այնպես էլ նրանց, ովքեր հայրենադարձման են պատրաստվում: