ԵՐԵՎԱՆ, 16 սեպտեմբերի – Sputnik. Վրաստանը ողջունում է ՀՀ կառավարության` հարևանների հետ հարաբերությունները կարգավորելու ջանքերը և պատրաստ է դերակատարում ունենալ տարածաշրջանում կայունություն և խաղաղություն հաստատելու համար: Այս հայտարարարությունն արեց Վրաստանի վարչապետ Իրակլի Կոբախիձեն ՀՀ վարչապետ Նիկոլ Փաշինյանի հետ համատեղ ճեպազրույցի ժամանակ։
Նա նաև նշեց, որ Փաշինյանի հետ խոսել են երկկողմ հարաբերությունները բոլոր ուղղություններով խորացնելու մասին` քաղաքական, տնտեսական, կրթական։
«Այս ուղղությունները մեզ համար առաջնահերթ են։ Բացի այդ, Վրաստանն աջակցում է Հարավային Կովկասում խաղաղությանն ու կայունությանը։ Հայ–ադրբեջանական հակամարտության լուծման ուղղությամբ ողջունում ենք ՀՀ ջանքերը։ Մենք պատրաստ ենք մեր ուժերի ներածին չափով դերակատարում ունենալ տարածաշրջանում կայունություն ապահովելու համար»,– նշեց Վրաստանի վարչապետը։
Կաբախիձեի խոսքով` Հայաստանի և Վրաստանի միջև ստորագրված «Ռազմավարական գործընկերության հաստատման մասին» հռչակագիրը բեկումնային պահ է եղել երկկողմ հարաբերությունների խորացման հարցում:
Նա ավելացրեց, որ ՀՀ վարչապետի հետ նաև շատ հետաքրքիր զրույց են ունեցել, տեսակետներ փոխանակել հայ–վրացական հարաբերությունների մասին։