ԵՐԵՎԱՆ, 16 սեպտեմբերի - Sputnik. Հայաստանն ու Վրաստանը երկկողմ հարաբերությունները կկառուցեն «ռազմավարական գործընկերության» պրիզմայով՝ անկախ նրանից, թե ով կգլխավորի երկու երկրների կառավարությունները։ Այդ մասին է վկայում ՀՀ վարչապետ Նիկոլ Փաշինյանի պաշտոնական այցը Թբիլիսի, համոզված է քաղաքական գիտությունների դոկտոր, Թբիլիսիի համալսարանի պրոֆեսոր Վախթանգ Մայիսայան:
2024 թվականի հոկտեմբերին Վրաստանում կայանալիք ընտրություններից առաջ Հայաստանի վարչապետ Նիկոլ Փաշինյանի գլխավորած պատվիրակության պաշտոնական այցը հարցեր է առաջացրել մի շարք փորձագետների մոտ։ Ոմանք այդ քայլը նույնիսկ գնահատում են որպես աջակցություն Վրաստանում իշխող «Վրացական երազանք - ժողովրդավարական Վրաստան»-ի թիմին։
Մայիսայան այլ կարծիքի է։ Sputnik Արմենիային տված հարցազրույցում նա նշեց, որ հատկապես «Ռազմավարական գործընկերության հաստատման մասին» հռչակագրի ստորագրումից հետո Երևանի և Թբիլիսիի հարաբերությունները որակապես փոխվել են և նոր մակարդակի են հասել։ Հիմա կողմերը դա բացահայտ ցույց են տալիս նաև գործնականում։
«Երկու երկրների միջև ձևավորվել են անձերով չպայմանավորված փոխհարաբերություններ։ Երևանի և Թբիլիսիի փոխգործակցությունը կզարգանա, անկախ նրանից, թե Վրաստանում ընտրություններից հետո ինչպիսի կառավարություն կձևավորվի՝ կոալիցիա ընդդիմադիր կուսակցությունների հետ, թե կառավարությունը կշարունակի ղեկավարել «Վրացական երազանքը»»,-ասաց Մայիսայան:
Նրա խոսքով՝ երկու երկրների կառավարությունների ղեկավարները պետք է համաձայնեցնեին ծրագրերը, դեմ առ դեմ քննարկեին կուտակված հարցերը։ Երևանը ներկայացրել է իր դիրքորոշումը տարածաշրջանում տիրող իրավիճակի և հարևան երկրների հետ հարաբերությունների վերաբերյալ, որոնց հետ Թբիլիսին 2000-ականներից ի վեր ռազմավարական փոխգործակցություն ունի: Վրացական կողմը նշել է իր դիրքորոշումը։
Մայիսայան չի բացառում, որ օրակարգի ընդլայնումից և տնտեսական կապերի խորացումից բացի, երկու երկրների կառավարությունների ղեկավարները կարող էին քննարկել նաև «Միջին միջանցք» աշխարհատնտեսական նախագծին Հայաստանի միանալու հնարավորությունը․Վրաստանը նախագծի ակտիվ մասնակիցներից մեկն է։
«Հայաստանի մասնակցությունը «Հյուսիս-Հարավ», ինչպես նաև «Արևելք-Արևմուտք» նախագծերի իրականացմանը նոր ազդակ կհաղորդի երկրի զարգացմանը ոչ միայն տնտեսական, այլև ֆինանսական առումով»,-ասաց նա:
Նշենք, որ ՀՀ վարչապետ Նիկոլ Փաշինյանի գլխավորած պատվիրակության Թբիլիսի կատարած այցի շրջանակներում բարձրացվել են նաև հայ-վրացական սահմանի սահմանազատման և սահմանագծման, ինչպես նաև տարածաշրջանում անվտանգության և խաղաղության հաստատման խնդիրներ:
Վրաստանի վարչապետ Իրակլի Կոբախիձեն հայտարարել էր, որ Վրաստանը ողջունում է Հայաստանի կառավարության ջանքերը հարևանների հետ հարաբերությունների կարգավորման ուղղությամբ և պատրաստ է նպաստել տարածաշրջանում կայունության և խաղաղության հաստատմանը: