ԵՐԵՎԱՆ, 13 սեպտեմբերի – Sputnik. ՌԴ–ում Բրիտանիայի դեսպանատան 6 աշխատակիցների հավատարմագրումը դադարեցվել է նրանց կողմից իրականացվող հետախուզաքայքայիչ աշխատանքի համար։ Այս մասին հայտնել է ՌԴ ԱԴԾ–ն։
Ավելի վաղ գերատեսչությունը հայտնել էր, որ փաստաթղթեր է ստացել, որոնք հաստատում են, որ Լոնդոնն է համակարգում աշխարհում ռազմաքաղաքական իրավիճակի սրացումը։ Ռուսական ուղղությամբ և ԱՊՀ–ում քայքայիչ քաղաքականությունը համակարգող գլխավոր կառույց է անվանվել Մեծ Բրիտանիայի ԱԳՆ–ի Արևելյան Եվրոպայի և Կենտրոնական Ասիայի դիրեկտորատը, որը Ուկրաինայում ռազմական հատուկ գործողության մեկնարկից հետո վերածվել է հատուկ ծառայության, որի հիմնական խնդիրը Ռուսաստանին ռազմավարական պարտության մատնելն է։
«Այսպիսով, բացահայտված փաստերը հիմք են ծառայում դիտարկելու բրիտանացի դիվանագետների դիրեկտորատի գծով Մոսկվա գործուղվողների գործունեությունը` որպես ՌԴ–ի անվտանգությանը սպառնացող գործունեություն», – ասվում է հաղորդագրության մեջ։
Նշվում է, որ ՌԴ ԱԴԾ–ի տրամադրած փաստաթղթերի հիման վրա, ինչպես նաև որպես պատասխան Լոնդոնի ոչ բարեկամական բազմաթիվ քայլերի, ՌԴ ԱԳՆ–ն շահագրգիռ գերատեսչությունների հետ փոխգործակցությամբ դադարեցրել է Մոսկվայում Մեծ Բրիտանիայի դեսպանատան քաղաքական բաժնի 6 աշխատակիցների հավատարմագրումը, որոնց գործողություններում հայտնաբերվել են հետախուզաքայքայիչ աշխատանքներ իրականացնելու հատկանիշներ։
Ընդգծվում է, որ նմանատիպ գործողությունների բացահայտման դեպքում բրիտանական դիվանագիտական ներկայացուցչության աշխատակիցներից ՌԴ ԱԴԾ–ն պահանջելու է վաղաժամ դադարեցնել իրենց գործուղումները ՌԴ–ում։