ԵՐԵՎԱՆ, 13 սեպտեմբերի – Sputnik. ՌԴ ԱԴԾ–ն փաստաթղթեր է ստացել, որոնք հաստատում են, որ Լոնդոնն է համակարգում աշխարհում ռազմաքաղաքական իրավիճակի սրացումը։ Այս մասին հայտնել է ուժային գերատեսչության մամուլի ծառայությունը։
«Նշված փաստաթղթերը վկայում են, որ Մեծ Բրիտանիայում գլխամասային ստորաբաժանումը, որը համակարգում է ՌԴ–ի ուղղությամբ (և նախկինում ԽՍՀՄ կազմի մեջ մտնող երկրներում) քայքայիչ քաղաքականությունը, Մեծ Բրիտանիայի ԱԳՆ–ի Արևելյան Եվրոպայի և Կենտրոնական Ասիայի դիրեկտորատն է, որը Ուկրաինայում ռազմական հատուկ գործողության մեկնարկից հետո վերածվել է հատուկ ծառայության, որի հիմնական խնդիրը մեր երկիրը ռազմավարական պարտության մատնելն է», – նշել է ԱԴԾ–ն։
ՌԻԱ Նովոստիի պարզաբանմամբ` սա առաջին դեպքը չէ, երբ ԱԴԾ–ն բացահայտում է Ռուսաստանում բրիտանացիների հետախուզաքայքայիչ աշխատանքը, որը քողարկվում է այլ գործունեության անվան տակ։ Այսպես, օրինակ, այս տարվա փետրվարին ԱԴԾ–ն հայտնել էր, որ Խերսոնի մարզի տարածքում բացահայտվելէ «Բրիտանական խորհրդի» (ԲԽ) գործունեությունը, որն իր ենթակայության տակ գտնվող կազմակերպությունների միջոցով հետախուզական աշխատանքներ էր իրականացնում կիևյան ռեժիմի շահերից ելնելով։ Մասնավորապես հաստատվել է, որ ԲԽ–ն Բրիտանիայի տարածքում ապրող ուկրաինացի փախստականներին օգտագործել է Խերսոնի մարզում ունեցած մտերիմ կապերի միջոցով ռազմաքաղաքական բնույթի հետախուզական տեղեկություններ ստանալու համար։
ԱԴԾ–ն ընդգծել է, որ «Բրիտանական խորհրդի» պաշտոնապես հայտարարված նպատակներից է Մեծ Բրիտանիայի և այլ երկրների միջև կրթության, մշակույթի և արվեստի ոլորտում համագործակցության զարգացումը, սակայն իրականում դա զուտ քողարկում է բրիտանական հատուկ ծառայությունների աշխատանքի համար։