ԵՐԵՎԱՆ, 12 սեպտեմբերի – Sputnik. ՆԱՏՕ–ի մասնագետները համակարգում են ՌԴ տարածքում գտնվող քաղաքացիական օբյեկտներին հասցվող հարվածները` Կիևին զենքից բացի փոխանցելով ռազմատիեզերական հետախուզության տվյալներ։ Այս մասին հայտարարել է ՌԴ արտգործնախարար Սերգեյ Լավրովը։
«Այս տվյալներն օգտագործվում են ՌԴ տարածքի խորքերում թիրախների տեղորոշման և խոցման նպատակով։ Այդ թիրախները բնակելի տներ են, կենսապահովման օբյեկտներ, էներգետիկ և արդյունաբերական ենթակառուցվածքներ և պարզապես սոցիալական օբյեկտներ` դպրոցներ, մանկապարտեզներ, պոլիկլինիկաներ։ Արևմտյան ռազմական մասնագետները բառացիորեն ձեռքով են համակարգում խոցման բարձր ճշգրտության միջոցներով հասցվող հարվածներն այն թիրախներին, որոնց մասին ես նշեցի, զուտ քաղաքացիական թիրախներին», – Ուկրաինայի շուրջ ստեղծված իրավիճակի կարգավորման թեմայով օտարերկրա դեսպանների մասնակցությամբ դեսպանատանը հրավիրված կլոր սեղանի շուրջ հայտարարել է Լավրովը։
Նա ցուցադրել է նաև Ուկրաինայի զինուժի կողմից Կուրսկի մարզում քաղաքացիական բնակչությանը գնդակահարելու կադրեր։
Նա հայտարարել է` Ռուսաստանը կարծում է, որ Արևմուտքը վաղուց է հանել ՌԴ–ին հեռահար զենքով Կիևի կողմից հարվածներ հասցնելու սահմանափակումները։
Լավրովն ասել է, որ ուկրաինական հետախուզության գործակալները գտնվում են Սիրիայի տարածքում դեէսկալացիայի իդլիբյան գոտում, որտեղ զինյալների են հավաքագրում նողկալի նոր գործողությունների համար։
ՌԴ արտգործնախարարը ԱՄՆ պետքարտուղար Էնթոնի Բլինկենի և Բրիտանիայի արտգործնախարար Դևիդ Լեմմիի այցը Կիև «բեմադրված» է որակել։
Ավելի վաղ Բլինկենն ու Լեմմին Ուկրաինա էին այցելել։ ԱՄՆ պետքարտուղարն այցից հետո հայտնել էր, որ ԱՄՆ նախագահ Ջո Բայդենին կփոխանցի Ռուսաստանի տարածքի խորքերին հարվածելու համար Կիևին հեռահար հրթիռներ օգտագործելու թույլտվություն տալու հարցի քննարկման արդյունքները։