ԵՐԵՎԱՆ, 10 սեպտեմբերի - Sputnik. Ուկրաինայի էներգահամակարգին հարվածելու վերաբերյալ հստակ պայմանավորվածություններ չեն եղել։ Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը, փոխանցում է ՌԻԱ Նովոստին:
«Որևէ հստակ պայմանավորվածություն չի եղել։ Հիմա, Կուրսկի մարզում տիրող իրավիճակի ֆոնին, ինչ-որ պայմանավորվածությունների հասնելու հնարավորությունը դժվար է պատկերացնել։ Բայց այս ամենով հանդերձ, մեզ համար, ևս մեկ անգամ կրկնում եմ՝ գլխավորը մեր նպատակներին հասնելն է», - ասել է Պեսկովը՝ պատասխանելով լրագրողի հարցին` Ռուսաստանը պատրա՞ստ է արդյոք հրաժարվել էներգետիկ օբյեկտներին, առևտրային, քաղաքացիական նավատորմին հարվածելուց, թե՞ նման առաջարկները միայն խնդիրներ են առաջացնում Ռուսաստանի համար։
Ավելի վաղ Ռուսաստանի Անվտանգության խորհրդի քարտուղար Սերգեյ Շոյգուն «Ռոսիա-24» հեռուստաալիքին տված հարցազրույցում հայտարարել էր, որ Ուկրաինայի՝ Կուրսկի մարզ ներխուժելուց առաջ Ռուսաստանի նախագահ Վլադիմիր Պուտինը պաշտպանել է Թուրքիայի՝ էներգետիկ օբյեկտներին, առևտրային, քաղաքացիական նավատորմին հարվածները դադարեցնելու գաղափարը, սակայն նման պայմանավորվածություններից հրաժարվել է հենց Ուկրաինան: