ԵՐԵՎԱՆ, 10 սեպտեմբերի – Sputnik. Հայաստանի հետ ռազմավարական գործընկերության հաստատումը Վրաստանի համար կարևոր քայլ էր։ Sputnik Արմենիայի հետ զրույցում այս հայտարարությունն արեց Վրաստանի փոխարտգործնախարար Լաշա Դարսալիան` մեկնաբանելով տարեսկզբին ստորագրված հռչակագիրը։
«Դա կարևոր քայլ էր Վրաստանի համար, նախևառաջ տարածաշրջանային համագործակցության և Հայաստանի հետ երկկողմ հարաբերությունների առաջմղման համատեքստում», – ասաց Դարսալիան։
Նրա խոսքով` Վրաստանը նաև կարծում է, որ այս քայլն ուղղված է տարածաշրջանում կայունություն և անվտանգություն հաստատելուն։
Փոխարտգործնախարարը նշեց, որ մինչ հռչակագրի ստորագրումը Հայաստանի և Վրաստանի հարաբերություններն անկախությունից ի վեր, ըստ էության, ռազմավարական բնույթ էին կրում։
Հիշեցնենք, որ 2024 թվականի հունվարին ՀՀ վարչապետ Նիկոլ Փաշինյանն ու Վրաստանի նախկին վարչապետ Իրակլի Ղարիբաշվիլին Թբիլիսիում հռչակագիր ստորագրեցին երկու երկրների միջև ռազմավարական գործընկերություն հաստատելու մասին։