ԵՐԵՎԱՆ, 10 սեպտեմբերի – Sputnik. Երևանի ավագանին վաղաժամկետ դադարեցրեց Երևանի ավագանու «Հանրային ձայն» խմբակցության անդամներ Անուշ Գինոսյանի և Անույշ Խուդավերդյանի լիազորությունները:
Ընդդիմության մի մասը բոյկոտեց և չմասնակցեց քվեարկությանը։
Ավելի վաղ վաղաժամկետ դադարեցվել էր Երևանի ավագանու «Ազգային առաջընթաց» խմբակցության ղեկավար Գրիգոր Երիցյանի լիազորությունները։
Անուշ Գինոսյանի և Անույշ Խուդավերդյանի լիազորությունների դադարեցման կոչով հանդես եկավ «Հանրային ձայն» խմբակցության ղեկավար Վահան Ավագյանը։ Նա ընդգծեց, որ ժամանակն է, որ այն մարդիկ, ովքեր իրենց կողքին չեն, լքեն ավագանու շարքերը։ Նա նաև ներկայացրեց, որ նշված ավագանու անդամները բացակայել են հրավիրված ավագանու նիստերից կեսից ավելին, ուստի ըստ օրենքի, պետք է դադարեցվի նրանց լիազորությունները։
Հայտնել էինք, որ հունվարի 11–ին «Հանրային ձայն» կուսակցության կառավարման խորհուրդը հայտարարություն էր տարածել, ըստ որի՝ կուսակցության խորհրդի անդամ Վարդան Ղուկասյանը ՌԴ քաղաքացիություն ունի, և այդ հիմքով դադարեցված է համարում նրա անդամությունը կուսակցությանը։
«Հանրային ձայն» կուսակցության հիմնադիր, խորհրդի անդամ Վարդան Ղուկասյանն էլ իր հերթին ուղիղ եթերում հայտարարել էր, որ եթե ինքը կուսակցությունում չլինի, կդադարի գոյություն ունենալ նաև կուսակցությունը։ Ի վերջո Վարդան Ղուկասյանն իր նոր ` «ԴՈԿ» կուսակցությունը բացեց, իսկ նրան աջակցող Անույշ Խուդավերդյանը և Անուշ Գինոսյանը փետրվարի 13–ին դուրս եկան «Հանրային ձայն» խմբակցության կազմից, բայց պահպանեցին ավագանու անդամի իրենց լիազորությունները։