ԵՐԵՎԱՆ, 9 սեպտեմբերի – Sputnik. Հայաստանի փոխվարչապետ Մհեր Գրիգորյանն այսօր հայտարարել է Եվրամիության հետ վիզաների ազատականացման շուրջ երկխոսության պաշտոնական մեկնարկի մասին: Ինչպես հայտնում է կառավարության մամուլի ծառայությունը, նա այդ մասին հայտարարել է Եվրոպական հանձնաժողովի փոխնախագահ, եվրոպական կենսակերպի հարցերով հանձնակատար Մարգարիտիս Սխինասի հետ հանդիպումից հետո։
«Այսօր մենք պաշտոնապես ազդարարում ենք մի գործընթացի մեկնարկ, որի վերջնարդյունքում հնարավոր կլինի հասնել ԵՄ կողմից մուտքի արտոնագրերի (վիզաների) ռեժիմի ազատականացմանը»,– ասել է Գրիգորյանը։
Նա հավելել է, որ վերջնանպատակին հասնելու համար անհրաժեշտ է հետևողական և հասցեական աշխատանք:
«Մենք այս գործընթացին իրապես վերաբերվում ենք որպես միգրացիայի, մարդկանց տեղաշարժի և սահմանների կառավարման ոլորտների արդիականացման ռազմավարական օրակարգի»,– հավելել է փոխվարչապետը:
Հիշեցնենք` Եվրոպական միության խորհուրդը հուլիսի 22-ին հավանություն է տվել ՀՀ-ի հետ վիզաների ազատականացման երկխոսության մեկնարկին։