ԵՐԵՎԱՆ, 9 սեպտեմբերի – Sputnik. Հայ–իրանական հարաբերություններն ու տարածաշրջանային իրավիճակին առնչվող հարցեր են քննարկել հայաստանում ԻԻՀ դեսպան Մեհդի Սոբհանին և ՀՀ Անվտանգության խորհրդի քարտուղար Արմեն Գրիգորյանը։ Աս մասին տեղեկանում ենք X սոցցանցում դեսպանատան էջում հրապարակված հաղորդագրությունից։
Հանդիպման ժամանակ հաղորդակցությունների ապաշրջափակման համատեքստում քննարկման առանցքային թեմա է դարձել Հայաստանով արտատարածքային միջանցքի անթույլատրելիությունը։
Ինչպես հայտարարել է Գրիգորյանը, Հայաստանի տարածքով ցանկացած հաղորդակցություն պետք է գտնվի ՀՀ վերահսկողության և ազգային ինքնիշխանության տակ, և Երևանը դեմ է «միջանցքային» ցանկացած տրամաբանության։
Հայաստանի և Իրանի սահմանը Գրիգորյանն անվանել է խաղաղության և բարեկամության սահման` հավելելով, որ որևէ ուժ ի զորու չէ այն խախտել։ Իրանի դեսպանն իր հերթին կրկին հիշեցրել է Թեհրանի սկզբունքային դիրքորոշումը` տարածաշրջանային սահմանների և աշխարհագրության ցանկացած փոփոխության բացառում։ Հայ պաշտոնյան երախտագիտություն է հայտնել դիվանագետին նման դիրքորոշման համար` հայտարարելով, որ Հայաստանի համար կարևոր են հարաբերություններն Իրանի հետ։
Նշենք, որ Թեհրանը դեմ է հանդես գալիս արտատարածքային միջանցքին, որը Հայաստանի տարածքով «մայրցամաքային» Ադրբեջանի և Նախիջևանի ցամաքային կապն ապահովելու նպատակով պահանջում են Բաքուն և Անկարան։