ԵՐԵՎԱՆ, 6 սեպտեմբերի – Sputnik. ՌԴ նախագահ Վլադիմիր Պուտինի այցի նախապատրաստման շրջանակում Միջազգային քրեական դատարանի (ՄՔԴ) աշխատանքներին Մոնղոլիայի մասնակցության թեմա ընդհանրապես չի առաջացել։ Այս մասին հայտարարել է ՌԴ արտգործնախարար Սերգեյ Լավրովը։
Պուտինը սեպտեմբերի 2-ին այցելել էր Մոնղոլիա, որը ստորագրել է Միջազգային քրեական դատարանի Հռոմի ստատուտը։
«Ինչ վերաբերում է ՄՔԴ–ին, ապա Ռուսաստանի նախագահի այցի նախապատրաստման շրջանակում այդ թեման ընդհանրապես չի ծագել։ Կարծում եմ` այն արհեստական է շրջանառվում։ Դա է ուզում Արևմուտքը` չամաչելով երկակի ստանդարտներից», – Արևելյան տնտեսական համաժողովի շրջանակում РБК–ին տված հարցազրույցում ասել է Լավրովը։
ՄՔԴ–ի նախաքննական պալատը, որի իրավասությունը Ռուսաստանը չի ճանաչում, ավելի վաղ Պուտինի և երեխաների իրավունքների հանձնակատարՄարիա Լվովա–Բելովայի համար ձերբակալման օրդեր էր տվել։ ՄՔԴ-ն ռուսական կողմին մեղադրում է նաև այն երեխաների «արտաքսման» մեջ, որոնց ռուսական իշխանությունը փրկել է ուկրաինական գնդակոծություններից և ռազմական գործողությունների գոտուց անվտանգ շրջաններ տեղափոխել: Ինչպես հայտարարել է Պեսկովը, ՄՔԴ–ի` ՌԴ նախագահին «ձերբակալելու» մասին հարցադրումն անընդունելի է, Մոսկվան չի ճանաչում նրա իրավասությունը, ու ՄՔԴ–ի ցանկացած որոշում առոչինչ է իրավական տեսանկյունից։
Արևելյան տնտեսական համաժողովն անցկացվում է սեպտեմբերի3-6-ը Վլադիվոստոկի Հեռավորարևելյան դաշնային համալսարանի տարածքում։ Sputnik–ը համաժողովի գլխավոր տեղեկատվական հովանավորն է։