ԵՐԵՎԱՆ, 6 սեպտեմբեր – Sputnik. Եթե COP 29 գագաթնաժողովի մասնակիցները անտեսեն Լեռնային Ղարաբաղի հակամարտության թեման, իսկ Բաքվի բանտերում պահվող հայ պատանդները ազատ չարձակվեն, ապա Ադրբեջանի նախագահ Իլհամ Ալիևին կտրվի հզոր հարթակ՝ էլ ավելի մեծացնելու ամբողջ Հայաստանը զավթելու իր աշխարհաքաղաքական հավակնությունները: Այս մասին հայտարարել է Միջազգային քրեական դատարանի նախկին դատախազ Լուիս Մորենո Օկամպոն աշխարհասփյուռ հայությանը ուղղված իր երկրորդ բաց նամակում։
«Նման սցենարը ոչ միայն կժխտի Լեռնային Ղարաբաղի ցեղասպանությունը և պատանդներին կդատապարտի երկարամյա բանտարկության, այլև ամբողջ համայնքն անցյալի մոռացված մասունք կդարձնի, և դա կմեծացնի վտանգը հենց Հայաստանի համար»,– գրել է Օկամպոն:
ՄՔԴ նախկին դատախազի համոզմամբ՝ աշխարհասփյուռ հայությունը պետք է COP 29-ի պատվիրակներից պահանջի բարձրաձայնել այս հարցերը:
Նա նշել է, որ Հայաստանն Ադրբեջանի հետ խաղաղության պայմանագրի շուրջ բանակցելու ընթացքում շարունակում է մնալ վտանգի տակ, քանի որ հստակություն չկա, որ Լեռնային Ղարաբաղի ժողովուրդը ապահով կվերադառնա իր նախնիների հողը։
Հիշեցնենք, որ նոյեմբերի 11-ից 24-ը Ադրբեջանում կանցկացվի Կլիմայի փոփոխության մասին ՄԱԿ-ի շրջանակային կոնվենցիայի մասնակիցների COP 29 գագաթնաժողովը։
2023 թվականի դեկտեմբերին որպես բարի կամքի քայլ Հայաստանը իր աջակցությունն էր հայտնել այն հյուրընկալելու նպատակով Ադրբեջանի ներկայացրած հայտին և հանել իր թեկնածությունը, իսկ Ադրբեջանն իր աջակցությունն էր հայտնել Արևելյան Եվրոպայի խմբի «COP»-ի բյուրոյին անդամակցելու համար առաջադրված Հայաստանի թեկնածությանը:
Հունիսին վարչապետի մամուլի խոսնակը, անդրադառնալով Նիկոլ Փաշինյանի` Բաքու մեկնելու և COP 29 ֆորումին մասնակցելու վերաբերյալ խոսակցություններին, ասել էր, որ վարչապետի աշխատանքային օրակարգում նման այց չի պլանավորվում: