ԵՐԵՎԱՆ, 6 սեպտեմբերի – Sputnik. Ալավերդիում այսօր կայացել է Սանահինի կամրջի բացման արարողությունը։ Կամուրջը Հայաստանին նվիրաբերել է Իրանի Իսլամական Հանրապետությունը։ Տեղեկությունը հայտնում է ՀՀ տարածքային կառավարման և ենթակառուցվածքների նախարար Գնել Սանոսյանը։
«Շնորհակալություն եմ հայտնել բարեկամ Իրանին կամրջի և առհասարակ` բարդ իրավիճակներում մշտապես Հայաստանի կողքին լինելու համար։ Հատկապես ընդգծել եմ այդ գործընթացներում դեսպանի ակտիվ դերակատարության, գործուն մասնակցության և հետևողական աջակցության փաստը»,–նշել է Սանոսյանը։
Հայաստանում ԻԻՀ դեսպան Մեհդի Սոբհանին իր հերթին ընդգծել է, որ մշտապես Հայաստանի կողքին են լինելու։
Կամրջի բացումից հետո Իրանի դեսպանի հետ Ալավերդու համայնքապետարանում Սանոսյանը խորհրդակցություն է անցկացրել, որի ժամանակ քննարկել են համատեղ իրականացվող մի շարք ծրագրերի կատարման ընթացքը։
Հիշեցնենք, որ Սանահինի կամուրջը փլուզվել էր մայիսի 26-ին Դեբեդ գետի վարարման պատճառով։ Տեղատարափ անձրևներից հետո Լոռու և Տավուշի մարզերում Դեբեդ, Աղստև և Տաշիր գետերի վարարման հետևանքով 4 մարդ է մահացել։