ԵՐԵՎԱՆ, 2 սեպտեմբերի – Sputnik. ՀՀ Իշխանությունները պետք է արցախցիների վերադարձի հարցը մտցնեն միջազգային օրակարգ։ Արցախի Անկախության օրվա կապակցությամբ լրագրողների հետ զրույցում այս հայտարարությունն արեց ընդդիմադիր պատգամավոր, «Պատիվ ունեմ» խմբակցության ղեկավար Հայկ Մամիջանյանը։
«Այդ թեման պետք է բարձրացվի ինչպես ներքաղաքական, այնպես էլ միջազգային դաշտում։ Սակայն Հայաստանի իշխանություններն այլ օրակարգ ունեն», - ասաց Մամիջանյանը։
Նրա խոսքով` ՀՀ ներկայիս իշխանությունները չեն կարող դա անել և ոչ այն պատճառով, որ չեն ուզում, այլ որ չեն կարող, քանի որ Հայաստանը տարածաշրջանում այլևս գործոն չէ։ Պատգամավորնընդգծեց, որ ժամանակին միջազգային հանրությունը հաշվի էր նստում Հայաստանի կարծիքի հետ, սակայն այժմ Հայաստանը դարձել է միջազգային իրավունքի օբյեկտ։
Ինչ վերաբերում է ընդդիմության գործունեությանը, ապա Մամիջանյանն ընդգծեց, որ իրենք մտադիր են պայքարել արդարության վերականգնման համար՝ օգտագործելով բոլոր մեխանիզմները: