Մենք սառեցրել ենք ՀԱՊԿ–ում մեր գործունեությունը, և այս փուլում դա համարում ենք բավարար։ Այդ մասին լրագրողների հետ հանդիպմանը հայտարարեց ՀՀ վարչապետ Նիկոլ Փաշինյանը։
«Այս պահին այլ որոշում կայացնելու անհրաժեշտություն չենք տեսնում, ինչը չի նշանակում, որ հաջորդ պահին այլ որոշում կայացնելու անհրաժեշտություն չենք տեսնի»,– հայտարարեց Փաշինյանը։
Դիտարկմանը, որ ՀՀ վարչապետն իր նախորդ հայտարարությունների մեջ նշել էր, որ ՀԱՊԿ անդամ երկու երկիր մասնակցել է ՀՀ դեմ 44–օրյա պատերազմին, կարո՞ղ է այսօր արդեն ասել անուններ, Փաշինյանը պատասխանեց, որ անուններ տալու հետ կապված ասել է այն, ինչ անհրաժեշտ է համարել ասել։
«Ավելացնելու անհրաժեշտություն ու նպատակահարամարություն չեմ գտնում նախորդ ասածիս»,– ընդգծեց նա։
Հիշեցնենք` 2024 թ. փետրվարի 23-ին հայտնի դարձավ, որ ՀՀ վարչապետ Նիկոլ Փաշինյանը «France24» հեռուստաալիքին տված հարցազրույցում ասել է` Հայաստանի նկատմամբ Հավաքական անվտանգության պայմանագիրը չի կատարվել, ուստի Երևանը սառեցրել է իր մասնակցությունը կազմակերպությանը (ՀԱՊԿ):
Փաշինյանը մարտի 12-ին չբացառեց, որ ՀՀ–ն կարող է դուրս գալ Հավաքական անվտանգության պայմանագրի կազմակերպությունից, եթե ՀԱՊԿ–ը չպատասխանի Հայաստանի բարձրացրած հարցին` ո՞րն է ՀԱՊԿ–ի պատասխանատվության գոտին Հայաստանում։ ՀԱՊԿ-ը պատասխանեց, որ Հայաստանում իր պատասխանատվության գոտին է համարում երկրի ինքնիշխան տարածքը։ Մայիսի 8-ին ՀՀ ԱԳՆ–ն հայտարարեց, որ Հայաստանը չի մասնակցի ՀԱՊԿ–ի գործունեության ֆինանսավորմանը։ Փաշինյանը հունիսի 14–ին Ազգային ժողովում հայտարարեց, որ հաջորդ տրամաբանական քայլը լինելու է ՀԱՊԿ–ից դուրս գալը: