Արտաքին գործերի նախարարությունն օրերս հայտարարել էր, որ վերջին շրջանում ստանում քաղաքացիներն ահազանգում են, որ Հայաստանում գործող եվրոպական երկրների որոշ դեսպանություններից ստանում են Շենգենյան վիզաներ, սակայն տվյալ երկիր ժամանելիս նրանց մուտքն արգելվում է, և ստիպված են լինում վերադառնալ Հայաստան։
Ըստ ԱԳՆ-ի՝ Հայաստանի քաղաքացիների մուտքն առանձին երկրներ արգելվում է այն պատճառով, որ Շենգենյան վիզա ստանալու ժամանակ՝ դիմում-հարցաթերթիկում և հարակից փաստաթղթերով ներկայացվում է բացառապես տվյալ երկիր մեկնելու նպատակ, սակայն վիզան ստանալուց հետո, այցելության նպատակը, ուղղությունը, ծրագիրը կամ հյուրանոցի ամրագրումը փոփոխվում կամ չեղարկվում է։
Հետևաբար՝ այցելության նպատակի նմանատիպ փոփոխությունը հիմք է տալիս տվյալ երկրի իրավասու մարմիններին արգելել մուտքը, քանի որ դա գնահատվում է որպես այցելության հայտարարված և իրական նպատակի կամ պայմանների անհամապատասխանություն։
Վիզա ստանալու համար անհրաժեշտ է դիմել Շենգենյան գոտու այն երկրի դեսպանություն, որտեղ նախատեսվում է այցելությունը, իսկ մի քանի երկրներ այցելելու դեպքում՝ հիմնական այցելության երկրի դեսպանություն, պարզաբանել են արտգործնախարարությունից։
Հայաստանի քաղաքացիների հանդեպ Եվրամիության որոշ երկրների մոտեցումները Նիդերլանդներում Հայաստանի նախկին դեսպան Ձյունիկ Աղաջանյանը պատճառաբանում է տվյալ երկրների ներգաղթային քաղաքականությամբ։
«Անկախ Եվրամիության որոշ երկրների միգրացիոն քաղաքականությունից, Հայաստանի քաղաքացիներին ֆինանսական և հոգեբանական ռիսկերից զերծ պահելու համար ՀՀ ԱԳն-ն պետք է պատշաճ իրազեկում իրականացնի»,-Sputnik Արմենիայի հետ զրույցում կարծիք է հայտնել Նիդերլանդներում Հայաստանի նախկին դեսպանը։