.jpg){kind=link}
ԵՐԵՎԱՆ, 22 օգոստոսի – Sputnik. Իրանի նախկին նախագահ Էբրահիմ Ռայիսիի այրին՝ Ջամիլե Սադաթ Ալամոլհոդան, քննադատել է արևմտյան ԶԼՄ-ներին՝ հայտարարելով, որ Արևմուտքը Իրանի վախեցնող կերպար է ստեղծել մեդիայի միջոցով:
Ալամոլհոդան կարծում է, որ աշխարհը գնում է դեպի բարոյական ոչնչացում։ Նրա կարծիքով` այնպիսի հակամարտություններ, ինչպիսին Գազայի հատվածում ընթացող պատերազմն է, չէին լինի կամ ավելի արագ կլուծվեին, եթե աշխարհն ավելի բարոյական դառնար:
«Արևմուտքը ցանկանում է, որ մեր երիտասարդությունը կորցնի վստահությունը մեր հանդեպ․.. Արևմտյան լրատվամիջոցները ստեղծել են Իրանի սարսափելի, վախեցնող իմիջ․.. Նրանք սխալ են ներկայացրել մեր բոլոր գործողությունները, շեշտը դրել են մեր հագուստի և հիջաբի վրա», – RT հեռուստաալիքին տված հարցազրույցում ասել է Ջամիլե Սադաթ Ալամոլհոդան։
Նա նշել է, որ ԱՄՆ-ն փորձում է բոլորին պարտադրել իր կանոնները և հետապնդում է նրանց, որոնք հրաժարվում են դրանց հետ համաձայնելուց, այդ թվում՝ Իրանին:
Ռայիսիի այրու խոսքով` Իրանում աշխատող այլ արտասահմանյան լրատվամիջոցներ ավելի ճիշտ և ազնվորեն են նկարագրում երկրում տիրող իրավիճակը: Ալամոլհոդան խոստովանել է, որ իրեն դուր է գալիս RT-ի քաղաքականությունը, և այն առաջին լրատվամիջոցն է, որին համաձայնել է հարցազրույց տալ Ռայիսիի մահից հետո:
Հիշեցնենք` ուղղաթիռը, որով թռչում էին նախագահ Ռայիսին, արտաքին գործերի նախարար Հոսեյն Ամիր Աբդոլլահիանը և այլ պաշտոնատար անձինք, մայիսի 19-ին կործանվեց երկրի հյուսիս-արևմուտքում՝ Վերզեգան շրջանում:
Վթարի հետևանքով զոհվեց 8 մարդ, այդ թվում՝ Ռայիսին և Աբդոլլահիանը: