ԵՐԵՎԱՆ, 21 օգոստոսի – Sputnik. Ըմբիշ Մարատ Աճեմյանը դարձավ Հորդանանի մայրաքաղաք Ամմանում անցկացվող մինչև 17 տարեկան ըմբիշների հունահռոմեական ոճի աշխարհի առաջնության փոխչեմպիոն։
45 կգ քաշային կարգում Մարատ Աճեմյանը եզրափակիչում համառ պայքարում պարտվեց Ռուսաստանի ներկայացուցիչ Ասլանբեկ Կոստոևին և դարձավ աշխարհի առաջնության արծաթե մեդալակիր։
Աճեմյանը Եվրոպայի առաջնության եզրափակիչում արդեն գոտեմարտել էր Կոստոևի հետ և հաղթել 10։0 հաշվով։
Բայց այս անգամ Կոստոևին հաղթել չհաջողվեց։ Գոտեմարտի ընթացքում հաղթելով նախ 1։0, ապա 3։2 հաշվով` Աճեմյանը ի վերջո պարտվեց մրցակցին։
Նշենք, որ այս տարիքային խմբում 45 կգ քաշային կարգում Եվրոպայի գործող չեմպիոն Մարատ Աճեմյանը երեք գոտեմարտ անցկացրեց։ Սկզբում հայ ըմբիշը 9։0 հաշվով հաղթեց իրանցի Ահմադ Բադրադինիին, ապա նույն հաշվով բացարձակ հաղթանակ տոնեց ադրբեջանցի Շահիդ Նաբիևի նկատմամբ։ Կիսաեզրափակիչում էլ Աճեմյանը 36 վայրկյանում 8։0 հաշվով պարտության մատնեց ուզբեկ Ումիջոն Կարոմովին։
51 կգ քաշային Սարգիս Հարությունյանը, հաղթելով սփոփիչ գոտեմարտում, իրավունք էր վաստակել գոտեմարտելու բրոնզե մեդալի համար։ Հայ ըմբիշի մրցակիցը իրանցի Աբոլֆազլ Կարամիեղաեյին էր։ 7։1 հաշվով հաղթեց իրանցի մարզիկը։