ԵՐԵՎԱՆ, 20 օգոստոսի – Sputnik. Ռուսաստանը հուսով է, որ Հայաստանը ԵԱՏՄ-ից չի հրաժարվի ԱՄՆ-ի և ԵՄ-ի պատճառով, որոնք միայն ներդրումներ և «լուսավոր ապագա» են խոստանում, իսկ թե ինչ է ստացվում դրանից, բոլորը շատ լավ գիտեն։ ՌԻԱ Նովոստիի հետ զրույցում այս մասին ասել է ՌԴ ԱԳՆ ԱՊՀ երկրների առաջին դեպարտամենտի տնօրեն Միքայել Աղասանդյանը։
«Մոսկվայի և Երևանի հարաբերությունները ԵԱՏՄ շրջանակում հիմնված են փոխշահավետ համագործակցության վրա։ Ակնհայտը դիտարկելու համար պետք չէ տնտեսության կամ քաղաքականության ոլորտի փորձագետ լինել. մեծ մասամբ հենց դրա շնորհիվ է, որ Հայաստանում տնտեսական աճի տեմպերը տպավորիչ դրական դինամիկա են ցուցադրում, ինչով քչերը կարող են պարծենալ»,– ասել է նա:
Մեկնաբանելով ՆԱՏՕ-ի և ԵՄ-ի հետ մերձենալու հայաստանյան ձգտումը՝ դիվանագետն ընդգծել է, որ Հայաստանն ընկել է ներդրումներ ու տեխնոլոգիաներ է խոստացող Արևմուտքի ծուղակը։
Հայաստանի անվտանգության խորհրդի քարտուղար ԱրմենԳրիգորյանն ավելի վաղ հայտարարել էր, որ Երևանը չի փոխում քաղաքական վեկտորը, այլ դիվերսիֆիկացնում է իր անվտանգությունը։ Նա ընդգծել էր, որ ՀՀ–ն գործընկերներ է փնտրում ոչ միայն Արևմուտքում, այլև Ասիայում:
ՌԴ ԱԳՆ տեղեկատվության և մամուլի դեպարտամենտի փոխտնօրեն ԱնդրեյՆաստասինն էլ հայտարարել էր, որ ԱՄՆ-ն, Հայաստանին և Ադրբեջանին հրավիրելով ՆԱՏՕ-ի գագաթնաժողովին, ձգտում է թուլացնել նրանց կապերը Ռուսաստանի հետ: