ԵՐԵՎԱՆ, 20 օգոստոսի – Sputnik. «Վեոլիա Ջուրը» 2025 թվականի համար կպահպանի գործող սակագները։ Սակագների ճշգրտման հայտն ընկերությունը ներկայացրել է ՀՀ հանրային ծառայությունները կարգավորող հանձնաժողով։ Տեղեկությունը հայտնում է հանձնաժողովի մամուլի ծառայությունը։
Հանձնաժողովից նշում են, որ «Վեոլիա Ջուր» ՓԲԸ–ն ՀՀ հանրային ծառայությունները կարգավորող հանձնաժողով խմելու ջրի մատակարարման և ջրահեռացման (կեղտաջրերի մաքրման) ծառայությունների մատուցման 2025 թ. սակագների ճշգրտման հայտը ներկայացրել է օգոստոսի 9–ին, որն ընդունվել է ուսումնասիրության։
«Բազիսային սակագները ենթարկվում են ճշգրտման` հաշվի առնելով հետևյալ գործոնները` մանրածախ ջրամատակարարման ծավալը, սղաճը, «Վեոլիա Ջուր» ՓԲԸ-ին մատակարարվող էլեկտրաէներգիայի սակագների փոփոխությունը, ջրային համակարգն այլ նպատակներով օգտագործելուց և խմելու ջուրը ոռոգման նպատակով մատակարարելուց ստացվող լրացուցիչ հասույթով պայմանավորված նվազեցումը»,– ասված է հանձնաժողովի հաղորդագրության մեջ։
Հանձնաժողովը որոշում կընդունի 80 աշխատանքային օրվա ընթացքում:
Նշենք, որ «Վեոլիա Ջուր» ՓԲԸ-ի կողմից բաժանորդներին խմելու ջրի մատակարարման և ջրահեռացման (կեղտաջրերի մաքրման) մանրածախ ծառայությունների մատուցման գումարը 180 դրամ է, իսկ մյուս բաժանորդների համար՝ 205.992 դրամ:
Հիշեցնենք, որ այս տարվա մարտի 28–ին ՀՀ կառավարությունը 1.1 մլրդ դրամ սուբսիդիա է տրամադրել «Վեոլիա Ջուր» ՓԲԸ-ին, որպեսզի մանրածախ ծառայություններից օգտվող սպառողների համար 2024 թ. խմելու ջրի և կեղտաջրերի մաքրման ծառայությունների սակագները մնան անփոփոխ։