ԵՐԵՎԱՆ, 19 օգոստոսի – Sputnik. Արմավիրի մարզի Աղավնատուն գյուղի սկզբնամասում այս գիշեր տեղի ունեցած ճանապարհատրանսպորտային պատահարի հետևանքով 2 մարդ է մահացել։ Տեղեկությունը հայտնում է ՆԳՆ փրկարար ծառայությունը։
Ճգնաժամային կառավարման ազգային կենտրոնը ժամը 00։21-ին տեղեկություն է ստացել, որ նշված գյուղի մոտ ավտոմեքենա է այրվում։
Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։
Պարզվել է, որ «Mercedes-Benz» մակնիշի ավտոմեքենան (վարորդ Մ. Գ.` ծնված 1990 թ․) դուրս է եկել ճանապարհի երթևեկելի հատվածից, բախվել կամարի սյանը և բռնկվել։
Հրդեհը մեկուսացվել է ժամը 00։40-ին, մարվել՝ 00։49-ին։ Այրվել է ավտոմեքենան։ Սրահում հայտնաբերվել են վարորդի և ուղևոր Գ. Ս.-ի (ծնված 1990 թ․) դիերը։
Փրկարարները դիերը դուրս են բերել հատուկ տեխնիկայի օգնությամբ։