ԵՐԵՎԱՆ, 17 օգոստոսի – Sputnik. Կիևը հարձակում է նախապատրաստում Կուրսկի ատոմակայանի վրա։ Այս մասին ահազանգում է ՌԴ ԱԳՆ պաշտոնական ներկայացուցիչ Մարիա Զախարովան։
«Մենք կոչ ենք անում միջազգային կազմակերպություններին, հատկապես ՄԱԿ-ին և ՄԱԳԱՏԷ-ին, անհապաղ դատապարտել Կիևի ռեժիմի կողմից նախապատրաստվող սադրիչ գործողությունները և կանխել Կուրսկի ատոմակայանի միջուկային և ֆիզիկական անվտանգության խախտումը, որը կարող է հանգեցնել լայնածավալ տեխնածին աղետի Եվրոպայում»,- ասվում է մեկնաբանության մեջ։
Զախարովան ընդգծել է, որ Կիևի նման գործողությունները ոչ միայն ուղղակի սպառնալիք են ստեղծում ատոմակայանների համար, այլև խաթարում են միջուկային անվտանգության և ֆիզիկական միջուկային անվտանգության վերաբերյալ ՄԱԳԱՏԷ-ի դրույթները, որոնք ձևակերպվել են գործակալության ղեկավար Ռաֆայել Գրոսիի կողմից 2022 թվականին։
«Մի շարք տարածաշրջանների և ընդհանուր առմամբ միջազգային հանրության ահաբեկման և նրանց նկատմամբ ահաբեկչության փորձերը պետք է վճռականորեն կանխվեն համատեղ ջանքերով», - ընդգծել է ՌԴ ԱԳՆ պաշտոնական ներկայացուցիչը:
Հիշեցնենք, որ ՌԴ ԶՈւ գլխավոր շտաբի պետ Վալերի Գերասիմովն օգոստոսի 7-ին հայտարարել էր, որ օգոստոսի 6-ին ՝ ժամը 5:30-ին, Ուկրաինայի զինված ուժերի մինչև հազար հոգանոց ստորաբաժանումներն անցել են հարձակման՝ Կուրսկի շրջանում տարածքներ գրավելու նպատակով: Մարզում մարտերը շարունակվում են մինչ օրս։