ԵՐԵՎԱՆ, 13 օգոստոսի – Sputnik. Վրաստանի իշխող «Վրացական երազանք» կուսակցությունը նախկին նախագահ Միխեիլ Սաակաշվիլուն մեղադրել է 2008 թվականի օգոստոսին Հարավային Օսեթիայի դեմ դրսից եկած հրահանգով պատերազմ սանձազերծելու մեջ։ Հայտարարության տեքստը մեջբերում է ՌԻԱ Նովոստին։
«Վրաստանի հանրության մեծ մասը կասկածում է, որ Սաակաշվիլին ադեկվատ է։ Սակայն փաստն այն է, որ 2008 թվականի օգոստոսին Սաակաշվիլիի արկածախնդիր գործողությունները ոչ թե նրա հոգեկան անհավասարակշիռ վիճակի հետևանք էին, այլ լավ ծրագրած և դրսից պատվիրված դավաճանության», – ասվում է հայտարարության մեջ։
«Վրացական երազանք» կուսակցությունում համարում են, որ պետք է հանրային–իրավական գործընթաց սկսել բացահայտելու համար` ով է իրականացրել Վրաստանի և նրա ժողովրդի դեմ դավաճանական այդ ծանր հանցագործությունը։
Ավելի վաղ Վրաստանի վարչապետ Իրակլի Կոբախիձեն հայտարարել էր, որ երկրի ղեկավարությունը ցանկացած իրավական ճանապարհով պարզելու է 2008 թվականի պատերազմի հանգամանքները։
Հիշեցնենք` 2008 թվականի օգոստոսի 8-ին Վրաստանը «Գրադ» համազարկային կրակի կայանքից հրթիռակոծեց Հարավային Օսեթիան։ Վրաստանի զորքերը հարձակվեցին հանրապետության վրա և ավերեցին մայրաքաղաք Ցխինվալը։ Ռուսաստանը, ի պաշտպանություն Հարավային Օսեթիայի բնակիչների, որոնց մեծ մասը ՌԴ քաղաքացիություն էին ընդունել, զորք մտցրեց հանրապետություն և հինգ օր տևած մարտական գործողություններից հետո այնտեղից վտարեց վրացի զինվորականներին։ Նույն թվականի օգոստոսի 26-ին Մոսկվան ճանաչեց Հարավային Օսեթիայի և մեկ այլ նախկին վրացական ինքնավարության ՝ Աբխազիայի ինքնիշխանությունը։ Ռուսաստանի ղեկավարությունը բազմիցս հայտարարել է, որ այդ փաստն արտացոլում է առկա իրողություններն ու վերանայման ենթակա չէ։ Թբիլիսին չի ճանաչում Աբխազիայի և Հարավային Օսեթիայի անկախությունը` այդ տարածքները համարելով Վրաստանի մաս։