ԵՐԵՎԱՆ, 12 օգոստոսի– Sputnik. ՀՀ կառավարությունը բազմաթիվ համայնքներում սուբվենցիոն ծրագրերով մայթեր է վերանորոգում, սակայն դրանք շատ հաճախ իրենց նպատակին չեն ծառայում։ Ֆեյսբուքյան էջում այս հայտարարությունն արեց ՀՀ վարչապետ Նիկոլ Փաշինյանը, որն այսօր է աշխատանքի վերադարձել գրեթե մեկ ամիս տևած արձակուրդից։
«Ես սովորություն ունեմ` գնում եմ տեսնելու, թե ինչ է արվել սուբվենցիոն ծրագրերով։ Ինձ համար տարօրինակ կերպով արձանագրում եմ, որ շատ հաճախ մայթերն օգտագործում են որպես ավտոկանգառ` մայթերի վրա մեքենաներ են կանգնած, ինչն իհարկե խնդրահարույց է։ Մենք այդ մայթերը վերականգնել ենք, որպեսզի հետիոտները հնարավորություն ունենան նորմալ քայլելու»,– ասաց նա։
Փաշինյանի խոսքով` անգամ հանդիպել է դեպքերի, երբ մարդիկ այդ մայթերի վրա ցեմենտ–ավազի շաղախ են անում իրենց շինարարական աշխատանքների համար` հաշվի չառնելով, որ այդ շաղախը ասֆալտի կամ սալահատակի վրա վատ հետևանք է թողնում։
«Եթե միլիարդներով գումար է ծախսվել, ու իր նպատակին չի ծառայելու այդ մայթը, ապա ինչի՞ համար էր այն ընդհանրապես պետք»,– դժգոհեց վարչապետը։
Նա տեղեկացրեց, որ այդ առիթով բոլոր պետական մարմիններին հանձնարարականներ է տվել։