Աշխարհին ցույց ենք տալիս, որ Սյունիքն ապահով զբոսաշրջավայր է. Սիսիանում «Նավասարդն» է

ԵՐԵՎԱՆ, 10 օգոստոսի - Sputnik. Արդեն 3-րդ անգամ Սյունիքի մարզի Սիսիան քաղաքը դառնում է հայ-իրանական մշակութային ավանդույթների հանդիպատեղի։ 2022թ. օգոստոսի 10-ին առաջին անգամ անցկացված «Նավասարդ» խոհանոցային-մշակութային փառատոնը սիրվել ու ավանդական է դարձել։

Փառատոնը մի քանի նպատակ ունի։ Գլխավորներից մեկը կորոնավիրուսային համավարակից հետո ոտքի կանգնող համաշխարհային զբոսաշրջային շուկայում հետաքրքիր, մրցունակ տարածաշրջանային առաջարկով ներկայանալն էր, քանի որ վերաձևավորվող շուկային նորություններ էին պետք դիրքերը պահպանելու և ընդլայնվելու համար։

«Կարևորագույն նպատակ էր նաև աշխարհին ցույց տալ, որ Հայաստանը ու այս պարագայում՝ Սյունիքն անվտանգ, ապահով, գրավիչ զբոսաշրջավայր է։ Այսօր, աշխարհաքաղաքական իրավիճակով պայմանավորված, Հայաստանը շատ նպատակային շուկա հանդիսացող երկրների պաշտոնական ինտերնետային կայքերում ներկայացվում է կարմիր սահմանագծերով»,-Sputnik Արմենիայի հետ զրույցում ասաց Տուրիզմի հայկական ֆեդերացիայի նախագահ Մեխակ Ապրեսյանը։

Իրանական տաղավարներում մեր հարևան երկրի մշակութային հարուստ ժառանգության տարբեր ուղղություններ են ներկայացված՝ իրանական հատուկ քյաբաբից՝ բոնափից մինչև բնական կոսմետիկա, նկարազարդ կերամիկա և այլն։ Տաղավարներից մեկում իրանցի հայտնի բանաստեղծ Հաֆեզի գազելներն են։ Ազգությամբ պարսիկ Օմիդ Բախտիարին մաքուր հայերենով բացատրում է՝ սա զրույց է Աստծո հետ։ Ու թեպետ փառատոնում ներկայացնում է իրանական կողմը, բայց արդեն 20 տարի է՝ Հայաստանում է ապրում։ Գերմանիա մեկնելու համար Հայաստան այցելությունը, ինչպես Օմիդն է ասում, իր «ղսմաթը» գտնելու առիթ դարձավ։ Ոչ ինքը կրոնը փոխեց, ոչ կինը՝ Անժելան, բայց կրոնական անհաշտություն չունեցան էլ։

«Տան մի պատին խաչն է, Հիսուսի նկարը, մի անկյունում էլ իմ Ղուրանն է։ 2 տղա ունենք, իրենք ազատ են իրենց հավատն ընտրելու հարցում»,- նշում է Օմիդը։

Ասում է՝ հայերի և պարսիկների միջև ընդհանրություններն ավելի շատ են, քան առաջին հայացքից թվում է։

Ընդհանուր առմամբ, փառատոնում մոտ 100 տաղավարներ են ներկայացված։

Փառատոնում նաև արցախյան մշակույթն ու խոհանոցն են, շուրջբոլորը տեղում թխվող ժենգյալով հացի բույրն է, հարևանությամբ Հադրութի ստեղծագործական կենտրոնի սաների և վարպետների աշխատանքներն են ներկայացված։ Կենտրոնում ուսուցումն անվճար է, ունեն ավելի քան 400 սան։ Մինչև 2023թ. հոկտեմբերը կենտրոնը ֆինանսավորվում էր Արցախի կառավարության կողմից։

«Մինչև դա փառատոնների մասնակցում էինք, բայց ձեռքի աշխատանքները չէինք վաճառում։ Հիմա այսպես փորձում ենք ինքնաբավ լինել, ներկայացնում ենք մեր գործերը, իսկ ստացված հասույթն օգտագործում կենտրոնը պահելու համար»,- ասում է կենտրոնի տնօրեն Իռա Թամրազյանը։

Արցախյան տաղավարներից ոչ հեռու անցյալ տարի ոսկե մեդալի արժանացած Համո Սահյանի անվան մշակույթի կենտրոնի ներկայացրած տաղավարն է։

Այստեղ Սիսիանի տարածաշրջանի ամբողջ ավանդական խոհանոցն է՝ թթուներով, պանիրներով, տարատեսակ համեղ թխվածքներով, հալվայով, տնական օղիների տեսականիով և այլն։ Տաղավարը պատրաստվել է 23 գյուղերի ջանքերով։ Հույս ունեն՝ այս տարի էլ հաղթանակով են տուն գնալու։

Փառատոնի շրջանակում նաև խոհանոցային մրցույթ է անցկացվում։

Միջոցառման կազմակերպիչներն են Տուրիզմի հայկական ֆեդերացիան և «Հայ խոհարարական ավանդույթների զարգացման և պահպանման» ՀԿ-ն՝ ՀՀ էկոնոմիկայի նախարարության զբոսաշրջության կոմիտեի աջակցությամբ, ՀՀ Սյունիքի մարզպետարանի, Սիսիանի համայնքապետարանի, ՀՀ-ում ԻԻՀ դեսպանության մշակութային կենտրոնի և Կապանում Իրանի գլխավոր հյուպատոսության հետ համագործակցությամբ։