ԵՐԵՎԱՆ, 8 օգոստոսի - Sputnik. Հայաստանը կարող է կապող օղակ դառնալ ԲՐԻԿՍ երկրների և Եվրոպայի միջև։ Այս մասին հայտարարել է ԲՐԻԿՍ-ի Առևտրաարդյունաբերական պալատի փոխնախագահ Սամի Շաստրին՝ պատասխանելով Sputnik Արմենիայի հարցին ԲՐԻԿՍ երկրների և Հայաստանի միջև լոգիստիկ շղթաների վերաբերյալ՝ հաշվի առնելով աշխարհագրական առանձնահատկությունները։
Շաստրին հիշեցրել է, որ ի սկզբանե ԲՐԻԿՍ-ի հայեցակարգը թերահավատություն էր առաջացնում մասնակից երկրների աշխարհագրական սփռվածության պատճառով. Բրազիլիան գտնվում է Հարավային Ամերիկայում, Հարավային Աֆրիկան՝ Աֆրիկայում, իսկ Չինաստանը, Ռուսաստանն ու Հնդկաստանը՝ Ասիայում:
«Սակայն այս հայեցակարգն արդարացրել է իրեն, և Հայաստանի տարածքով տրանսպորտային երթուղիները կարող են հաջող լինել։ Հայաստանը կարող է կարևոր դեր խաղալ Եվրոպա ապրանքների առաքման հարցում»,-նշեց նա։
Շաստրին հավելեց, որ Հայաստանը կարող է կարևոր լոգիստիկ հանգույց դառնալ Հարավարևելյան Ասիայի երկրների համար՝ օգնելով ապրանքներ տեղափոխել Եվրոպա: Նա ընդգծեց տրանսպորտային նոր ուղիների ստեղծման կարևորությունը, հատկապես մատակարարման շղթաների գլոբալ խափանումների պայմաններում։
Այս համատեքստում նա ընդգծեց, որ ենթակառուցվածքների և տրանսպորտային տեխնոլոգիաների զարգացումը առանցքային գործոններ են։
«Հիմա ինքնաթիռներ են հայտնվում, որոնք պակաս ծախսատար էներգիա են օգտագործում, ակտիվորեն ներդրվում է էլեկտրոնային բանկինգը»,-ասել է Շաստրին՝ ընդգծելով նոր ճանապարհների և առաքման ուղիների կառուցման, ինչպես նաև նոր տեխնոլոգիաների ներդրման անհրաժեշտությունը:
Շաստրին նաև շեշտել է, որ Հայաստանն իր հարուստ բնական պաշարներով և զարգացած գյուղատնտեսությամբ գրավում է ԲՐԻԿՍ երկրների ուշադրությունը: Նա հավելել է, որ այդ համատեքստում երկրները կարող են փորձի փոխանակում կատարել և համագործակցություն հաստատել։
Հիշեցնենք, որ Հայաստանը, Իրանն ու Հնդկաստանը քննարկում են առևտրային միջանցքի գործարկումը, որը Սև ծովի վրացական նավահանգիստներով Հնդկաստանն ու Իրանը կկապի Եվրոպայի հետ և հակառակը՝ ԵՄ-ն Հնդկաստանի հետ: Հայաստանի տարածքով անցնող այս միջանցքը Հնդկաստանին թույլ կտա ավելի կարճ երթուղով մուտք գործել Սև ծովի նավահանգիստներ և ԵԱՏՄ շուկա: