Մի շարք գործոնների հաշվառմամբ ոսկին էժանանում է

ԵՐԵՎԱՆ, 6 օգոստոսի - Sputnik. Դոլարի ամրապնդման և ԱՄՆ պետական պարտատոմսերի եկամտաբերության աճի ֆոնին օգոստոսի 6-ի երեկոյան ոսկու արժեքը նվազում է: Այս մասին գրում է ՌԻԱ Նովոստին։

Մոսկվայի ժամանակով ժամը 17.20-ի դրությամբ Նյու Յորքի Comex սակարանում ոսկու դեկտեմբերյան ֆյուչերսների գինը նվազում է 10.3 դոլարով կամ 0.42 %-ով՝ մեկ տրոյ ունցիայի (զանգվածի չափման միավոր, որը հավասար է 31․1 գրամի – խմբ․) դիմաց հասնելով 2 434.1 դոլարի: Արծաթի սեպտեմբերյան ֆյուչերսներն էժանանում են 0,04 %-ով՝ մեկ ունցիայի դիմաց հասնելով 27,195 դոլարի:

Միևնույն ժամանակ, դոլարի ինդեքսը (ԱՄՆ առևտրային գործընկեր վեց երկրների արժույթների զամբյուղի փոխարժեքը) աճում է 0,27% -ով՝ հասնելով 102,96 նիշի: Ամերիկյան արժույթի ամրապնդումը նվազեցնում է այլ արժույթների սեփականատերերի կողմից ոսկու պահանջարկը:

ԱՄՆ-ի տասնամյա պետական պարտատոմսերի (US Treasuries) եկամտաբերությունը նախորդ փակման 3,78 %-ի մակարդակից աճում է մինչև 3,831 %: ԱՄՆ պետական պարտատոմսերը ոսկու այլընտրանքային, հուսալի ակտիվ են, ըստ այդմ՝ ոսկու գնանշումները և ԱՄՆ պետական պարտատոմսերի եկամտաբերությունը, որպես կանոն, ունեն բազմակողմանի դինամիկա։