ԵՐԵՎԱՆ, 2 օգոստոսի – Sputnik․ ՀՀ ՊՆ–ն արձագանքել է Արցախի Հանրապետության պաշտպանության նախարար-պաշտպանության բանակի հրամանատար Կամո Վարդանյանին ՀՀ պաշտպանության նախարարի խորհրդական նշանակելու լուրին։
Ավելի վաղ այս մասին գրել էր «Ժողովուրդ» օրաթերթը։ Վարդանյանն ինքն էլ չէր հերքել այդ լուրը։
ՊՆ–ից հայտնում են, որ ՀՀ զինված ուժերում անձը կարող է ծառայության անցնել բացառապես այն դեպքում, երբ ունի ՀՀ քաղաքացիություն:
ՀՀ պաշտպանական գերատեսչությունից հավելում են, որ պաշտպանության նախարարի զինվորական խորհրդականները 3-ն են՝ գեներալ-մայոր Ա. Սիմոնյանը, պահեստազորի գնդապետ Ռ. Պետրոսյանը, պահեստազորի գնդապետ Մ. Պողոսյանը:
Ենթադրվում է, որ Կամո Վարդանյանը Սուրեն Պապիկյանի խորհրդական է նշանակվել հասարակական հիմունքներով։
Հիշեցնենք` Կամո Վարդանյանը Արցախի նախագահ Արայիկ Հարությունյանի հրամանագրով Արցախի պաշտպանության նախարար-պաշտպանության բանակի հրամանատարի պաշտոնում նշանակվել էր 2020 թվականի պատերազմի ավարտից մեկ տարի հետո` 2021-ի սեպտեմբերի 11–ին։
Մինչև սեպտեմբերի 11–ը այդ պաշտոնը զբաղեցնում էր Միքայել Արզումանյանը։