Իրանի հոգևոր առաջնորդ, այաթոլլա Ալի Խամենեին դատապարտել է Փարիզի օլիմպիական խաղերի բացման ժամանակ Հիսուս Քրիստոսի նկատմամբ սրբապղծությունը։ Նա այդ մասին հայտարարել է ՀՀ վարչապետ Նիկոլ Փաշինյանի հետ հանդիպման ժամանակ։
Ավելի վաղ Ֆրանսիայի դեսպանը Իրանի ԱԳՆ էր կանչվել օլիմպիական խաղերի բացման արարողության ժամանակ Հիսուս Քրիստոսին վիրավորելու համար:
«Մենք ընդհանուր կրոնական համոզմունքներ ունենք քրիստոնյաների հետ։ Հիսուս Քրիստոսի հանդեպ հարգանքը մուսուլմանների շրջանում պարտադիր հավատ է։ Մենք դատապարտում ենք Հիսուսի նկատմամբ վիրավորական գործողությունները»,– նշել է Իրանի հոգևոր առաջնորդը։
Հիշեցնենք` 33-րդ ամառային օլիմպիական խաղերի բացման հանդիսավոր արարողությունը տեղի ունեցավ հուլիսի 26-ին Ֆրանսիայի մայրաքաղաք Փարիզում։ Խաղերի բացումն առաջին անգամ անցկացվում էր ոչ թե մարզադաշտում, այլ Սեն գետում՝ նավակների վրա։ 206 երկրների մարզիկներ նավերի շքերթով իրենց երկրների դրոշները ծածանեցին Փարիզում։
Օլիմպիական խաղերի պաշտոնական փակումը տեղի կունենա օգոստոսի 11–ին։