ԵՐԵՎԱՆ, 29 հուլիսի – Sputnik․ Չափագիտության ազգային ինստիտուտում առերևույթ կոռուպցիոն չարաշահման արդյունքում հափշտակված ավելի քան 53 մլն դրամի վնասը վերականգնվել է։ Տեղեկությունը հայտնում է ՀՀ քննչական կոմիտեի մամուլի ծառայությունը։
Մայիսին հայտնել էինք, որ ինստիտուտում 8 տարի շարունակ աշխատավարձեր են դուրս գրվել 27 անձանց անուններով, ովքեր իրականում ո՛չ աշխատանքի են հաճախել, ո՛չ էլ աշխատանքային պարտականություններ կատարել։
Ինստիտուտի նախկին պաշտոնատար անձինք 2010-2018 թթ, մի խումբ անձանց հետ նախնական համաձայնությամբ, 27 աշխատակիցների հրամանագրել են տարբեր հաստիքներում՝ պետությանը պատճառելով ավելի քան 51 միլիոն դրամի վնաս։
ՔԿ–ի տարածած վերջին հաղորդագրության մեջ նշվում է, որ 28 անձինք են տարբեր հաստիքներում հրամանագրվել և պետությանը պատճառվել է 53.427.789 ՀՀ դրամի չափով վնաս, որն ամբողջությամբ վերականգնվել է։
Քրեական վարույթի շրջանակներում քրեական հետապնդում է հարուցվել 2 անձի նկատմամբ։
Նախաքննությունը շարունակվում է։