ԵՐԵՎԱՆ, 26 հուլիսի – Sputnik. Սամցխե–Ջավախքում տեղի է ունեցել Վրաստանի և Հայաստանի խորհրդարանական բարեկամական խմբերի հանդիպումը: Այդ մասին տեղեկացնում են վրացական լրատվամիջոցները։
Նշվում է, որ հայկական պատվիրակությունը գլխավորում էր ԱԺ փոխնախագահ Ռուբեն Ռուբինյանը: Կողմերը քննարկել են տնտեսական և քաղաքական հարցեր, երկու երկրների խորհրդարանների համագործակցությանը և փոխշահավետ ուղղություններին վերաբերող հարցեր:
«Չափազանց կարևոր է ընդգծել մեկ հանգամանք. վրացական կողմը շահագրգռված է Հայաստանի կայունությամբ, ինչպես նաև ողջունում ենք Հայաստանի պրագմատիկ մոտեցումն այն կայունության նկատմամբ, որը պահպանվել է այս բարդ իրավիճակում»,– հանդիպման ժամանակ ասել է Վրաստանի խորհրդարանի փոխխոսնակ Գիա Վոլսկին։
Վոլսկիի խոսքով` հարևանները պետք է լավ իմանան միմյանց խնդիրների մասին։
Նշենք, որ Հայաստան–Վրաստան բարեկաման խմբի կազմի մեջ հայկական կողմից ներառված են «Քաղաքացիական պայմանագիր» խմբակցությունից Վահագն Ալեքսանյանը, Զարուհի Բաթոյանը, Արփինե Դավոյանը, Շիրակ Թորոսյանը, Մարիա Կարապետյանը, Վաղարշակ Հակոբյանը, Արթուր Հովհաննիսյանը։
«Հայաստան» խմբակցությունից ներառված են Արմեն Գևորգյանը, Արեգնազ Մանուկյանը, Արծվիկ Մինասյանը, Քրիստինե Վարդանյանը, Սեյրան Օհանյանը։
«Պատիվ ունեմ» խմբակցություններ անդամներ խմբի կազմում ներառված չեն։